આણંદ જિલ્લાના પેટલાદમાં આવેલ સ્વામિનારાયણ મંદિરમાં વહેલી સવારે આગની ઘટના બનતા હડકંપ મચી ગયો હતો. મંદિરના રસોડા વિભાગમાં અચાનક આગ ફાટી નીકળતા ભક્તો અને સેવાધારીઓમાં અફરાતફરીનો માહોલ સર્જાયો હતો. જોકે, ફાયર બ્રિગેડની સમયસૂચકતાને કારણે એક મોટી હોનારત થતા અટકી ગઈ છે.

દિરના રસોડામાં જ્યારે રસોઈ બનાવવાની કામગીરી ચાલી રહી હતી, ત્યારે અચાનક ગેસ સ્ટવ/સ્ટીમરમાં ટેકનિકલ ખામી સર્જાતા જોરદાર ભડકો થયો હતો. જોતજોતામાં આગે વિકરાળ સ્વરૂપ ધારણ કરી લીધું હતું અને રસોડામાં ધુમાડાના ગોટેગોટા જોવા મળ્યા હતા.

જે સમયે આગ લાગી ત્યારે મંદિરમાં મોટી સંખ્યામાં ભક્તો સેવામાં હાજર હતા. આગની જ્વાળાઓ જોતા જ જીવ બચાવવા માટે લોકોમાં નાસભાગ મચી ગઈ હતી. આ સમગ્ર ઘટનાનાCCTV ફૂટેજ પણ સામે આવ્યા છે, જેમાં જોઈ શકાય છે કે આગ કેટલી ભયાનક હતી અને લોકો કઈ રીતે જીવ બચાવવા દોડી રહ્યા છે.

ઘટનાની જાણ થતા જ પેટલાદ ફાયર ફાઈટરની ટીમ તાત્કાલિક ઘટનાસ્થળે પહોંચી ગઈ હતી. ફાયરના જવાનોએ ભારે જહેમત બાદ આગ પર કાબુ મેળવ્યો હતો. સદનસીબે, આ ઘટનામાં કોઈ પણ વ્યક્તિને ઈજા કે જાનહાનિ થઈ નથી, જેનાથી વહીવટી તંત્ર અને મંદિર પ્રશાસને રાહતનો શ્વાસ લીધો છે.