ગાંધીનગર:: દિલ્હીના ભારત મંડપમ ખાતે જ્યારે વિશ્વભરના ટેક દિગ્ગજો ભારતની શક્તિ જોઈ રહ્યા છે, ત્યારે ત્યાં થયેલા હંગામાએ રાજકીય આલમમાં ભારે ગરમાવો લાવી દીધો છે. યુથ કોંગ્રેસના કાર્યકરો દ્વારા કરવામાં આવેલા વિરોધ પ્રદર્શન પર ગુજરાતના ગૃહ રાજ્યમંત્રી અને નાયબ મુખ્યમંત્રી હર્ષભાઈ સંઘવીએ આકરા પ્રહારો કર્યા છે. તેમણે આ ઘટનાને માત્ર રાજકીય વિરોધ નહીં, પણ દેશની છબી ખરડવાનું એક વ્યવસ્થિત ષડયંત્ર ગણાવ્યું છે.
“શર્ટ કાઢીને પ્રદર્શન કરવું એ શરમજનક”
હર્ષભાઈ સંઘવીએ આક્ષેપ કર્યો હતો કે રાહુલ ગાંધીના ઈશારે કેટલાક તત્વોએ સમિટમાં ઘૂસીને અરાજકતા ફેલાવી છે. તેમણે કહ્યું કે, "યુથ કોંગ્રેસના કાર્યકરોએ જે રીતે શર્ટ કાઢીને પ્રદર્શન કર્યું તે અત્યંત શરમજનક છે. જ્યારે ભારત વિશ્વને AI (આર્ટિફિશિયલ ઈન્ટેલિજન્સ) જેવી આધુનિક ટેકનોલોજીમાં દિશા બતાવી રહ્યું હોય, ત્યારે પોતાના જ દેશના લોકો આવી હરકતો કરે તે દુર્ભાગ્યપૂર્ણ છે."
પાકિસ્તાન અને ચીનને તક મળી રહી છે
DyCM સંઘવીએ ચિંતા વ્યક્ત કરતા જણાવ્યું હતું કે વિપક્ષના આવા વર્તનથી ભારત વિરોધી દેશોને મસાલો મળી રહ્યો છે. તેમણે ઉમેર્યું કે, "આ પ્રકારના વિરોધ પ્રદર્શનના વીડિયો સોશિયલ મીડિયા પર વાયરલ થવાથી પાકિસ્તાન અને ચીન જેવા દેશોને ભારતની બદનામી કરવાની તક મળે છે. વિપક્ષે ભાજપનો વિરોધ કરવામાં હવે દેશના હિતોને પણ દાવ પર લગાવી દીધા છે."
લોખંડી બંદોબસ્ત વચ્ચે ગાબડું અને ધરપકડ
શુક્રવારે સમિટ દરમિયાન અચાનક થયેલા આ હંગામાને પગલે સુરક્ષા એજન્સીઓ દોડતી થઈ ગઈ હતી. દિલ્હી પોલીસે ત્વરિત કાર્યવાહી કરતા અત્યાર સુધીમાં ૪ મુખ્ય આરોપીઓની ધરપકડ કરી લીધી છે. પોલીસ હવે એ તપાસ કરી રહી છે કે આટલી કડક સુરક્ષા હોવા છતાં આ કાર્યકરો અંદર કેવી રીતે ઘૂસ્યા અને આ પાછળ કોનું માસ્ટરમાઈન્ડ છે.
ગુજરાતથી દિલ્હી સુધી રાજકીય જંગ
માત્ર હર્ષભાઈ સંઘવી જ નહીં, પરંતુ મુખ્યમંત્રી ભૂપેન્દ્રભાઈ પટેલે પણ આ મામલે કોંગ્રેસને ઘેરી છે. ભાજપના નેતાઓનું કહેવું છે કે કોંગ્રેસ હવે 'ભાજપનો વિરોધ કરતાં કરતાં ભારતનો વિરોધ' કરવા લાગી છે. આ ઘટનાએ ૨૦૨૬ની શરૂઆતમાં જ દેશમાં એક નવો રાજકીય વિવાદ છેડી દીધો છે.