સાબરકાંઠા:સ્ટેટ મોનિટરિંગ સેલ (SMC) ની ટીમે સાબરકાંઠા જિલ્લામાં દારૂબંધીના કડક અમલ માટે વધુ એક સફળ ઓપરેશન પાર પાડ્યું છે. એસએમસીના પીએસઆઈ જે.એચ. સિસોદિયા અને તેમની ટીમે તલોદ તાલુકાના પાનાપુર ગામ પાસે રોઝડથી તેનપુર જવાના માર્ગ પર વોચ ગોઠવી વિદેશી દારૂનો મોટો જથ્થો ઝડપી પાડ્યો છે. લક્ઝરી કારમાં રાજસ્થાનથી ગુજરાતમાં ઘુસાડવામાં આવતા દારૂના આ જથ્થા સાથે પોલીસે એક આરોપીની ધરપકડ કરી છે.
૧૭૧૫ બોટલ દારૂ અને મુદ્દામાલ જપ્ત:
દરોડા દરમિયાન એસએમસીની ટીમે મારુતિ સુઝુકી બ્રેઝા કારને અટકાવી તલાશી લેતા તેમાંથી વિદેશી દારૂની કુલ ૧૭૧૫ બોટલો મળી આવી હતી. પોલીસે નીચે મુજબનો મુદ્દામાલ જપ્ત કર્યો છે:
 * વિદેશી દારૂની કિંમત: રૂ. ૪,૯૪,૭૬૮
 * મારુતિ સુઝુકી બ્રેઝા કાર: રૂ. ૫,૦૦,૦૦૦
 * મોબાઈલ ફોન (૦૧): રૂ. ૫,૦૦૦
 * કુલ મુદ્દામાલ: રૂ. ૯,૯૯,૭૬૮
ઝડપાયેલ આરોપીની વિગત:
પોલીસે સ્થળ પરથી રાજસ્થાનના એક શખ્સની ધરપકડ કરી તેને તલોદ પોલીસ સ્ટેશન હવાલે કર્યો છે:
૧. દિનેશ કાલ્યાભાઈ હોટા (રહે. શિશોદ ગામ, તા. બિછીવાડા, જિ. ડુંગરપુર, રાજસ્થાન)
સપ્લાયર અને રિસીવર સહિત ૫ શખ્સો વોન્ટેડ:
તપાસ દરમિયાન ખુલ્યું હતું કે આ દારૂનો જથ્થો રાજસ્થાનના ઉદયપુરથી મોકલવામાં આવ્યો હતો અને નડિયાદ ખાતે પહોંચાડવાનો હતો. એસએમસીએ આ કેસમાં પાંચ શખ્સોને વોન્ટેડ જાહેર કર્યા છે:
૧. રવિબાપુ ઉર્ફે પંડિતજી (દારૂ સપ્લાયર - ઉદયપુર, રાજસ્થાન)
૨. અજીતબાપુ ઉર્ફે જુવાનસિંહ (દારૂ સપ્લાયર - ઉદયપુર, રાજસ્થાન)
૩. ગૌતમ પટેલ
૪. બ્રેઝા કારનો માલિક (એન્જિન નં- K15BN4099924 ના આધારે તપાસ)
૫. નડિયાદનો અજાણ્યો શખ્સ (દારૂ મંગાવનાર રિસીવર)
કાયદાકીય કાર્યવાહી:
આ દરોડા મામલે પ્રોહીબિશન એક્ટની વિવિધ કલમો તેમજ ભારતીય ન્યાય સંહિતા (BNS-2023) ની સંબંધિત કલમો હેઠળ ગુનો દાખલ કરવામાં આવ્યો છે. પીએસઆઈ જે.એચ. સિસોદિયાની આ કાર્યવાહીથી સાબરકાંઠા જિલ્લામાં બુટલેગરો અને અસામાજિક તત્વોમાં ભારે ફફડાટ વ્યાપી ગયો છે.