સાણંદ (અમદાવાદ) | તા.૨૮: વડાપ્રધાન નરેન્દ્ર મોદીએ શનિવારે ગુજરાતના સાણંદ ખાતે અમેરિકી કંપની માઇક્રોનની અત્યાધુનિક એસેમ્બલી, ટેસ્ટિંગ અને પેકેજિંગ (ATMP) સુવિધાનું ભવ્ય ઉદ્ઘાટન કર્યું છે. આ સાથે જ ભારતે સેમિકન્ડક્ટર ક્ષેત્રે 'નીતિ'થી 'ઉત્પાદન' સુધીની સફર સફળતાપૂર્વક પાર કરી છે. પ્લાન્ટના ઉદ્ઘાટન પ્રસંગે પીએમ મોદીએ વિશ્વને સ્પષ્ટ સંદેશ આપ્યો કે, "ભારત સક્ષમ છે, સ્પર્ધાત્મક છે અને પ્રતિબદ્ધ છે." આ સુવિધા ભારતની પ્રથમ સ્થાનિક રીતે ઉત્પાદિત ચિપના લોન્ચિંગની સાક્ષી બની છે, જે ભારતને વૈશ્વિક સપ્લાય ચેઇનમાં મજબૂત સ્થાન અપાવશે.

વડાપ્રધાને ઐતિહાસિક સામ્યતા આપતા જણાવ્યું હતું કે, જેમ ઔદ્યોગિક ક્રાંતિ મશીનો દ્વારા આવી હતી, તેમ હવેની AI ક્રાંતિ સેમિકન્ડક્ટર ચિપ્સ દ્વારા આવશે. તેમણે ઉમેર્યું કે, "જો ગત સદીમાં તેલ દુનિયાની વ્યવસ્થા નક્કી કરતું હતું, તો આ ૨૧મી સદીનું નિયમન માઇક્રોચિપ કરશે." સાણંદમાં માઇક્રોનની હાજરીથી હવે આ વિસ્તાર ઓટોમોબાઇલ હબની જેમ જ સેમિકન્ડક્ટર હબ તરીકે પણ વિશ્વભરમાં નામના મેળવશે. આ પ્રોજેક્ટ દ્વારા સીધી રીતે ૫,૦૦૦ જેટલી હાઈ-ટેક નોકરીઓનું સર્જન થશે, જે ભારતના યુવાનો માટે નવા દ્વાર ખોલશે.

રતન ટાટાની વાતને કરી યાદ અને યુએસ-ભારત સંબંધો પર ભાર: સંબોધન દરમિયાન પીએમ મોદી ભાવુક થયા હતા અને સ્વર્ગસ્થ ઉદ્યોગપતિ રતન ટાટાને યાદ કરતા કહ્યું કે, તેમણે એકવાર કહ્યું હતું કે 'જુઓ એક ગુજરાતી એક રૂપિયાના રોકાણથી શું કરી શકે છે.' આ વાત આજે સાણંદમાં સાચી સાબિત થઈ રહી છે. આ કાર્યક્રમમાં અમેરિકી રાજદૂત એરિક ગારસેટી પણ હાજર રહ્યા હતા. પીએમ મોદીએ આ પ્રોજેક્ટને ભારત અને અમેરિકા વચ્ચેના મજબૂત ટેકનોલોજીકલ સંબંધોનું મૂર્ત પ્રતીક ગણાવ્યું હતું.

માઇક્રોન ટેકનોલોજી દ્વારા સ્થાપિત આ સુવિધામાં SSDs અને RAM મોડ્યુલોમાં વપરાતી ચિપ્સનું પેકેજિંગ થશે. આનાથી ભારતની વિદેશી ચિપ્સ પરની નિર્ભરતા ઘટશે અને ભારત આત્મનિર્ભર બનવા તરફ વધુ એક ડગલું આગળ વધશે. વડાપ્રધાને ખાતરી આપી હતી કે ભારત સરકાર સેમિકન્ડક્ટર ક્ષેત્રે રોકાણ કરનારાઓ માટે લાલ જાજમ પાથરવા તૈયાર છે અને આગામી સમયમાં જ્યારે આવા અનેક પ્રોજેક્ટ્સ ધમધમતા થશે, ત્યારે ભારતીય અર્થતંત્રને એક નવી ઊંચાઈ મળશે.