અમદાવાદ :મિડલ ઇસ્ટમાં ચાલી રહેલી યુદ્ધ જેવી પરિસ્થિતિને કારણે ગુજરાત ગેસ કંપની દ્વારા ઔદ્યોગિક એકમોને અપાતા ગેસ સપ્લાયમાં ઘટાડો થવાની સંભાવના છે. આનાથી ઉત્પાદન પર સીધી અસર પડી શકે છે. 

મિડલ ઇસ્ટના સંઘર્ષને કારણે વૈશ્વિક ઊર્જા સપ્લાય ચેઇન પર અસર પડી રહી છે, જેનાથી ગુજરાતના ઔદ્યોગિક વિસ્તારોમાં ચિંતા વ્યાપી છે. ખાસ કરીને અંકલેશ્વરના ઉદ્યોગકારો માટે ગેસ પુરવઠામાં ઘટાડાની શક્યતા ઊભી થઈ છે.

ગુજરાત ગેસ કંપનીએ ઉદ્યોગોને મોકલેલી સૂચના મુજબ, LNG ગેસની ઉપલબ્ધતા ઘટવાને કારણે ગેસ પુરવઠો લગભગ 50 ટકા સુધી ઘટાડવામાં આવી શકે છે. કંપનીએ ગેસ સપ્લાય કરાર હેઠળ "ફોર્સ મેજર" જાહેર કરીને ઉદ્યોગોને ગેસના વપરાશમાં મર્યાદા રાખવા જણાવ્યું છે.

આ સંકટનું મુખ્ય કારણ મિડલ ઇસ્ટમાં ચાલી રહેલો સંઘર્ષ અને તેના કારણે Strait of Hormuz વિસ્તારમાં શિપિંગમાં ઊભો થયેલો અવરોધ છે. આ માર્ગ વિશ્વના મોટા પ્રમાણમાં તેલ અને ગેસના પરિવહન માટે મહત્વપૂર્ણ છે, જેમાં અવરોધ આવતા વૈશ્વિક સપ્લાય ચેઇન પર સીધી અસર પડી છે.

પરિણામે, ભારતમાં LNG આયાતમાં વિક્ષેપ પડ્યો છે અને અનેક ઉદ્યોગોને ગેસ સપ્લાય ઘટાડવાની ફરજ પડી શકે છે.

ગેસ પુરવઠામાં ઘટાડો થવાથી કેમિકલ, સિરામિક અને પ્રોસેસ ઇન્ડસ્ટ્રી જેવા ગેસ આધારિત ઉદ્યોગો પર સીધી અસર થશે. આનાથી ઉદ્યોગોનો ઉત્પાદન ખર્ચ વધશે અને ઉત્પાદનમાં ઘટાડો થવાની પણ સંભાવના છે.

અંકલેશ્વર ઉદ્યોગ મંડળના પ્રમુખ વિમલ જેઠવાએ ઉદ્યોગકારોને ગેસ કંપનીની માર્ગદર્શિકા મુજબ ગેસનો ઉપયોગ કરવા અને લઘુત્તમ જથ્થાના બુકિંગની શરતોનું પાલન કરવા અપીલ કરી છે.

જો આ સ્થિતિ લાંબા સમય સુધી ચાલુ રહેશે, તો ઔદ્યોગિક ઉત્પાદન પર તેની ગંભીર અસર જોવા મળી શકે છે.