રાજકોટ: ગુજરાત રાજ્યના વહીવટી તંત્રમાં આગામી દિવસોમાં મોટા પાયે ફેરબદલ થવાના સંકેતો મળી રહ્યા છે. સચિવાલયના વિવિધ વિભાગોના વહીવટી સેટઅપમાં ભલે કોઈ મોટા ફેરફારો ન જણાય, પરંતુ જિલ્લા વહીવટીતંત્રમાં વ્યાપક સ્તરે ફેરબદલ થવાની પૂરેપૂરી શક્યતા છે. ખાસ કરીને સ્થાનિક સ્વરાજ્યની સંસ્થાઓની ચૂંટણીઓની જાહેરાત ચાલુ વિધાનસભા સત્ર દરમિયાન અથવા સત્ર પૂર્ણ થયાના તુરંત બાદ થવાની સંભાવના હોવાથી આ બદલીઓ ખૂબ જ ઝડપથી કરવામાં આવી શકે છે.
અમદાવાદ અને ગાંધીનગર કલેક્ટર પદે આવશે નવા ચહેરા
જિલ્લા કલેક્ટર કચેરીઓના સ્તરે મોટા ફેરફારોની અપેક્ષા રાખવામાં આવી રહી છે. ગાંધીનગરના કલેક્ટર મેહુલ દવે તાજેતરમાં નિવૃત્ત થયા છે, જેના કારણે આ મહત્વની જગ્યા હાલ ખાલી છે અને અન્ય અધિકારીને તેનો વધારાનો હવાલો સોંપવામાં આવ્યો છે. તેવી જ રીતે, અમદાવાદના કલેક્ટર સુજીત કુમારની સચિવ તરીકે બઢતી થયા બાદ તેમની બદલી હવે લગભગ નિશ્ચિત માનવામાં આવે છે. આ બંને મુખ્ય શહેરોમાં નવા કલેક્ટરોની નિમણૂક વહીવટી દ્રષ્ટિએ મહત્વની બની રહેશે.
દોઢ ડઝનથી વધુ અધિકારીઓની બદલીના સંકેત
રાજકીય અને વહીવટી વર્તુળોમાં ચર્ચાતી વિગતો મુજબ, રાજ્યના દોઢ ડઝનથી વધુ કલેક્ટરો અને જિલ્લા વિકાસ અધિકારીઓની (DDO) બદલીની યાદી તૈયાર હોવાનું મનાય છે. આ યાદીમાં કચ્છમાં લાંબા સમયથી કાર્યરત આનંદ પટેલ સહિતના અનેક સિનિયર અધિકારીઓનો સમાવેશ થઈ શકે છે. લાંબા સમયથી એક જ જિલ્લામાં ફરજ બજાવતા અધિકારીઓને અન્યત્ર ખસેડીને ચૂંટણી પૂર્વે વહીવટી તંત્રને સજ્જ કરવામાં આવશે.
ચૂંટણી પૂર્વેના આ સંભવિત ફેરબદલને કારણે વહીવટી આલમમાં ભારે ઉત્સુકતા જોવા મળી રહી છે. સરકાર આ બદલીઓ દ્વારા વહીવટી પ્રક્રિયામાં નવી ઊર્જા લાવવા અને ચૂંટણીલક્ષી તૈયારીઓને આખરી ઓપ આપવા માંગતી હોય તેમ જણાય છે.