અમદાવાદ: ક્રિકેટ જગતનો સૌથી મોટો રોમાંચ હવે તેના અંતિમ પડાવ પર છે. આવતીકાલે, ૮ માર્ચ ૨૦૨૬ના રોજ વિશ્વના સૌથી મોટા ક્રિકેટ ગ્રાઉન્ડ, અમદાવાદના નરેન્દ્ર મોદી સ્ટેડિયમ ખાતે ICC મેન્સ T20 વર્લ્ડ કપ ૨૦૨૬ની હાઈ-વોલ્ટેજ ફાઈનલ મેચ રમાશે. સેમીફાઈનલમાં ઈંગ્લેન્ડને ધૂળ ચટાડ્યા બાદ હવે ટીમ ઈન્ડિયાનો સામનો ન્યુઝીલેન્ડ સામે થવાનો છે. અમદાવાદમાં અત્યારથી જ દિવાળી જેવો માહોલ જામ્યો છે.
હૈદરાબાદ અને પુણેથી ઉમટ્યું ચાહકોનું ઘોડાપૂર
ભારત ફાઈનલમાં આવશે જ એવા અતૂટ વિશ્વાસ સાથે હૈદરાબાદથી આવેલા રોહિત મહેતાએ જણાવ્યું કે, તેમણે મહિનાઓ અગાઉ જ ટિકિટ બુક કરાવી લીધી હતી. ફેન્સ માની રહ્યા છે કે ભલે યુવા ઓપનર અભિષેક શર્મા છેલ્લી મેચોમાં ફ્લોપ રહ્યો હોય, પણ ફાઈનલના મોટા મંચ પર તે ચોક્કસપણે વિસ્ફોટક બેટિંગ કરશે. પુણેથી આવેલા ચાહક મનોજે આશા વ્યક્ત કરી છે કે જો ભારત ૨૫૦ થી ૨૬૦ રન બનાવી લેશે, તો ન્યુઝીલેન્ડ માટે આ લક્ષ્ય આંબવું અશક્ય બની જશે.
સૂર્યાની કેપ્ટન્સી અને ખેલાડીઓનું ફોર્મ
કેપ્ટન સૂર્યકુમાર યાદવના નેતૃત્વમાં ભારતીય ટીમ અત્યંત સંતુલિત દેખાઈ રહી છે. સંજુ સેમસન, હાર્દિક પંડ્યા અને જસપ્રીત બુમરાહ જેવા ખેલાડીઓ અત્યારે શાનદાર ફોર્મમાં છે. બીજી તરફ, મિશેલ સેન્ટનરની આગેવાની હેઠળની ન્યુઝીલેન્ડની ટીમે દક્ષિણ આફ્રિકાને હરાવીને ફાઈનલમાં સ્થાન મેળવ્યું છે, જે ભારત માટે મોટો પડકાર બની શકે છે.
સાંજે ૭ વાગ્યાથી જામશે ખરો ખેલ
આવતીકાલે રવિવારે સાંજે ૭:૦૦ વાગ્યાથી જ્યારે સિક્કો ઉછળશે ત્યારે આખું અમદાવાદ 'ઇન્ડિયા-ઇન્ડિયા'ના નાદથી ગુંજી ઉઠશે. સ્ટેડિયમની બહાર અત્યારથી જ ફેન્સ ટીમ ઇન્ડિયાની જર્સી અને તિરંગા ખરીદવા માટે લાઈનો લગાવી રહ્યા છે. શું ભારત ઘરઆંગણે ફરી એકવાર વિશ્વ વિજેતા બનીને ઈતિહાસ રચશે? તે જોવા માટે આખી દુનિયાની નજર અમદાવાદ પર ટકેલી છે.