વડોદરા: આજથી ક્રિકેટના સૌથી નાના અને સૌથી રોમાંચક ફોર્મેટ એવા T20 વર્લ્ડ કપનો પ્રારંભ થઈ રહ્યો છે, ત્યારે સમગ્ર દેશમાં ક્રિકેટનો જ્વર ચરમસીમાએ છે. સંસ્કારી નગરી અને ક્રિકેટરોના ગઢ ગણાતા વડોદરામાં તો આ ઉત્સાહ કંઈક અલગ જ સ્તરે જોવા મળ્યો છે. ટીમ ઈન્ડિયા ફરી એકવાર વર્લ્ડ ચેમ્પિયન બને તે માટે વડોદરાના ક્રિકેટ ચાહકોએ બેટ-બોલ છોડીને હાથમાં પૂજાની થાળી લીધી છે અને ભગવાનના શરણે પહોંચ્યા છે.
વૈદિક મંત્રોચ્ચાર અને જીતની આશા
વડોદરાના અનેક વિસ્તારોમાં આજે સવારથી જ ક્રિકેટ પ્રેમીઓ એકઠા થયા હતા. શહેરના જાણીતા ચોક અને મંદિરો પાસે વિશેષ હવન કુંડ તૈયાર કરવામાં આવ્યા હતા. શાસ્ત્રીજીઓ દ્વારા વૈદિક મંત્રોચ્ચાર સાથે હવન શરૂ કરવામાં આવ્યો અને ટીમ ઈન્ડિયાના દરેક ખેલાડીના શ્રેષ્ઠ પ્રદર્શન માટે આહુતિ આપવામાં આવી હતી. ચાહકોનું માનવું છે કે મહેનતની સાથે જ્યારે આશીર્વાદ ભળે છે, ત્યારે વિજય નિશ્ચિત બને છે.
ક્રિકેટ એક રમત નહીં, પણ ઈમોશન છે!
હવનમાં જોડાયેલા યુવાનોએ ગર્વ સાથે જણાવ્યું હતું કે, "ભારતમાં ક્રિકેટ એ માત્ર રમત નથી, પણ એક લાગણી છે." હાઈ-વોલ્ટેજ મુકાબલાઓ શરૂ થાય તે પહેલાં જ વડોદરામાં જાણે દિવાળી જેવો માહોલ સર્જાયો હતો. ચાહકોએ પ્રાર્થના કરી હતી કે ભારતીય બેટ્સમેનો ચોગ્ગા-છગ્ગાની રમઝટ બોલાવે અને બોલરો વિરોધી ટીમના સ્ટમ્પ ઉખેડી નાખે. હવન દરમિયાન “ટીમ ઈન્ડિયા જીતશે” ના નારાઓથી સમગ્ર વાતાવરણ દેશભક્તિના રંગે રંગાયું હતું.
ટ્રોફી ઘરે લાવવાની આતુરતા
વડોદરાના ખેલપ્રેમીઓને પૂરો વિશ્વાસ છે કે ભારતીય ટીમ આ વખતે ટ્રોફી જીતીને દેશનું ગૌરવ વધારશે. અગાઉના વર્લ્ડ કપની યાદો તાજી કરતા ચાહકોએ જણાવ્યું કે, ટ્રોફી ફરી એકવાર ભારતની ધરતી પર આવે અને આખું ભારત જીતની ઉજવણીમાં ડૂબી જાય તે જોવાની અમારી પ્રબળ ઈચ્છા છે. આ અનોખા આયોજન દ્વારા વડોદરાએ સાબિત કરી દીધું છે કે ટીમ ઈન્ડિયા માટે તેમનો પ્રેમ અતૂટ છે.