વડોદરા: સંસ્કારી નગરી વડોદરાના અકોટા વિસ્તારમાં આજે રવિવારની શાંત બપોરે અચાનક ચીસાચીસ અને દોડધામ મચી ગઈ હતી. અકોટા ખાતે આવેલા ગુજરાત હાઉસિંગ બોર્ડના બ્લોક નંબર 18 ના એક મકાનમાં રાંધણ ગેસના સિલિન્ડરની પાઈપ અચાનક ફાટતા ભયાનક આગ ફાટી નીકળી હતી. આ દુર્ઘટનામાં ઘરમાં હાજર એક યુવક દાઝી જતાં તેને તાત્કાલિક હોસ્પિટલ ખસેડવામાં આવ્યો છે.
રસોઈ બનાવતી વખતે ત્રાટકી આફત
બનાવની વિગતો મુજબ, મકાનમાં રોજિંદી રીતે રસોઈ બનાવવાની કામગીરી ચાલી રહી હતી. ગૃહિણી રસોઈમાં વ્યસ્ત હતી તે જ સમયે ગેસ સિલિન્ડર સાથે જોડાયેલી પાઈપમાં અચાનક મોટું પંચર પડ્યું અથવા ફાટી ગઈ હતી. ગણતરીની સેકન્ડોમાં ગેસ લીક થવાને કારણે આખા રસોડામાં આગના ગોટા ઉડવા લાગ્યા હતા. આગ એટલી ઝડપી હતી કે ઘરમાં રહેલા લોકોને સંભાળવાનો પણ મોકો મળ્યો નહોતો.
મહેન્દ્ર નામનો યુવક દાઝ્યો, પડોશીઓ બન્યા દેવદૂત
આ અકસ્માતમાં ઘરમાં હાજર મહેન્દ્ર નામનો યુવક આગની લપેટમાં આવી ગયો હતો અને તેના હાથના ભાગે ગંભીર ઈજાઓ પહોંચી હતી. આગ જોઈને આસપાસના રહીશોમાં ફફડાટ વ્યાપી ગયો હતો, પરંતુ ગભરાવાને બદલે સ્થાનિક યુવાનોએ અદભૂત હિંમત બતાવી હતી. પડોશીઓએ તાત્કાલિક પાણીનો મારો ચલાવી અને પોતાની રીતે આગને કાબૂમાં લેવાના પ્રયાસો શરૂ કર્યા હતા. લોકોની આ સમયસૂચકતાને કારણે સિલિન્ડર બ્લાસ્ટ થતા રહી ગયો હતો અને એક મોટી દુર્ઘટના સહેજમાં ટળી હતી.
ફાયર બ્રિગેડની કામગીરી અને નુકસાન
ઘટનાની જાણ થતાં જ 108 એમ્બ્યુલન્સ અને ફાયર બ્રિગેડની ટીમ ઘટનાસ્થળે દોડી આવી હતી. ફાયર ફાઈટરોએ બાકી રહેલી આગને સંપૂર્ણપણે બુઝાવી દઈ સ્થિતિ પર કાબૂ મેળવ્યો હતો. જોકે, આગ એટલી વિકરાળ હતી કે મકાનમાં રહેલી તમામ ઘરવખરી, કપડાં અને કિંમતી સામાન બળીને ખાખ થઈ ગયો છે. ઈજાગ્રસ્ત યુવકને હોસ્પિટલમાં સારવાર હેઠળ રાખવામાં આવ્યો છે અને હાલ પોલીસ આ મામલે વધુ તપાસ કરી રહી છે.