શિહોરી (બનાસકાંઠા): બનાસકાંઠા જિલ્લાના કાંકરેજ તાલુકાના શિહોરી પંથકમાં એક હૃદયદ્રાવક અને ચકચારી ઘટના સામે આવી છે. સાસરીમાં સુખ શોધવા ગયેલી 25 વર્ષીય પરિણીતા હેતલબાનું રહસ્યમય સંજોગોમાં મોત થતા સમગ્ર પંથકમાં સનસનાટી મચી ગઈ છે. પિયર પક્ષે સાસરીયાઓ પર દીકરીની હત્યાનો ગંભીર આક્ષેપ લગાવતા આ મામલે હવે પોલીસ તપાસનો ધમધમાટ શરૂ થયો છે.
સમજાવટ બાદ સાસરીમાં ગયા અને લાશ બની પાછા આવ્યા
મળતી વિગતો અનુસાર, હેતલબા છેલ્લા કેટલાક સમયથી સાસરીયા પક્ષ સાથે ચાલી રહેલા વિવાદ અને ઘરકંકાસને કારણે પોતાના પિયરમાં રહેતા હતા. અંદાજે 10 દિવસ પહેલા જ સાસરીયા પક્ષના સભ્યો તેમને સમજાવી-ફોસલાવીને ભાભર ખાતે તેમના ઘરે તેડી ગયા હતા. પિયર પક્ષને આશા હતી કે હવે બધું થાળે પડી જશે, પરંતુ પિયરથી સાસરીમાં ગયાના ગણતરીના દિવસોમાં જ હેતલબાનું શંકાસ્પદ મોત થતા અનેક સવાલો ઉભા થયા છે.
હોસ્પિટલ લાવતા પહેલા જ મોત, પિયરિયાઓનો આક્રોશ
ગત રાત્રિ દરમિયાન હેતલબાનું મોત થયાની જાણ થતા પિયર પક્ષના લોકો શિહોરી રેફરલ હોસ્પિટલ ખાતે દોડી આવ્યા હતા. પિયર પક્ષનો આક્ષેપ છે કે જ્યારે હેતલબાને હોસ્પિટલ લાવવામાં આવ્યા ત્યારે તેઓ પહેલેથી જ મૃત હાલતમાં હતા. પરિવારજનોની શંકા છે કે લાંબા સમયથી ચાલતા વિવાદનો અંત લાવવા સાસરીયાઓએ જ કાવતરું રચીને હેતલબાને મોતને ઘાટ ઉતારી દીધા છે. હોસ્પિટલના પટાંગણમાં પિયર પક્ષના આક્રંદ અને આક્રોશથી વાતાવરણ ગમગીન બની ગયું હતું.
પોલીસ તપાસ અને પોસ્ટમોર્ટમ પર નજર
ઘટનાની ગંભીરતાને જોતા શિહોરી પોલીસે મૃતદેહને પોસ્ટમોર્ટમ (PM) અર્થે ખસેડ્યો છે. પોલીસે અકસ્માત મોતનો ગુનો નોંધીને તપાસ હાથ ધરી છે. પિયર પક્ષની માંગ છે કે આ મામલે તટસ્થ તપાસ કરવામાં આવે અને જો સાસરીયાઓની સંડોવણી સાબિત થાય તો તેમને કડકમાં કડક સજા મળે. પોસ્ટમોર્ટમ રિપોર્ટ બાદ જ સ્પષ્ટ થશે કે આ આત્મહત્યા છે, કુદરતી મોત કે પછી કોઈ પૂર્વનિયોજિત હત્યા.