ગાંધીનગર: આજે જ્યારે સમગ્ર વિશ્વ આંતરરાષ્ટ્રીય મહિલા દિવસની ઉજવણી કરી રહ્યું છે અને મહિલાઓના સન્માનની વાતો થઈ રહી છે, ત્યારે ગુજરાતની રાજધાની ગાંધીનગરમાં નારી શક્તિના સંઘર્ષના વરવા દ્રશ્યો જોવા મળ્યા હતા. પોતાના ન્યાયી હક અને અધિકારો માટે લાંબા સમયથી લડત ચલાવી રહેલી આંગણવાડી કાર્યકર બહેનોએ આજે ગાંધીનગર ખાતે વિશાળ વિરોધ પ્રદર્શન કર્યું હતું. જોકે, આ આંદોલનને ડામવા માટે પોલીસે કડક વલણ અપનાવી ૧૦૦થી વધુ બહેનોની અટકાયત કરી હતી.
"ન્યાય આપો" ના નારાથી ગૂંજ્યું પાટનગર
રાજ્યભરમાંથી મોટી સંખ્યામાં આંગણવાડી બહેનો ગાંધીનગરના સત્યાગ્રહ છાવણી અને આસપાસના વિસ્તારોમાં એકત્ર થઈ હતી. ગર્ભવતી મહિલાઓ અને બાળકોના પોષણની જવાબદારી જેમના ખભે છે, તેવી આ બહેનોએ સરકાર સામે બાયો ચઢાવી હતી. "અમારો હક અમને આપો", "માનદ વેતન વધારો" અને "આંગણવાડી બહેનોને કાયમી કરો" જેવા ગગનભેદી સૂત્રોચ્ચારોથી પાટનગરનું વાતાવરણ ગરમાયું હતું.
પોલીસ અને આંદોલનકારી બહેનો વચ્ચે ઘર્ષણ
વિરોધ પ્રદર્શન દરમિયાન જ્યારે બહેનોએ આગળ વધવાનો પ્રયાસ કર્યો ત્યારે પોલીસ સાથે ઘર્ષણની સ્થિતિ સર્જાઈ હતી. ટ્રાફિક વ્યવસ્થા ખોરવાતા અને સુરક્ષાના કારણોસર પોલીસે બળપ્રયોગ કરી ૧૦૦થી વધુ મહિલા કાર્યકરોની અટકાયત કરી હતી. બહેનોને બળજબરીપૂર્વક પોલીસ બસમાં બેસાડીને અલગ-અલગ સ્થળોએ લઈ જવામાં આવી હતી. આંતરરાષ્ટ્રીય મહિલા દિવસે જ બહેનોની આ પ્રકારે અટકાયત થતા સરકારની નીતિઓ સામે અનેક પ્રશ્નો ઉભા થયા છે.
બહેનોની મુખ્ય માગણીઓ
આંગણવાડી બહેનો છેલ્લા ઘણા સમયથી લઘુત્તમ વેતન, કાયમી કર્મચારીનો દરજ્જો, નિવૃત્તિ બાદ પેન્શન અને નવી ટેકનોલોજી માટે સારા મોબાઈલ ફોન જેવી માગણીઓ કરી રહી છે. બહેનોનો આરોપ છે કે સરકાર તેમની પાસે પાયાની તમામ કામગીરી કરાવે છે પરંતુ બદલામાં પૂરતું વળતર કે સુરક્ષા આપતી નથી. ડેટા એન્ટ્રીના કામનો બોજ અને નેટવર્કની સમસ્યાઓ પણ તેમના કામમાં અવરોધ બની રહી છે.
સંગઠિત લડત ચાલુ રાખવાની ચીમકી
પોલીસ અટકાયત બાદ મુક્ત થયેલી બહેનોએ સ્પષ્ટ શબ્દોમાં જણાવ્યું હતું કે, "અટકાયતથી અમારો અવાજ દબાશે નહીં." આંતરરાષ્ટ્રીય મહિલા દિવસે થયેલા આ અપમાનનો જવાબ તેઓ આગામી દિવસોમાં આંદોલન વધુ તેજ કરીને આપશે. હવે જોવાનું એ રહે છે કે, નારી વંદનાના કાર્યક્રમો કરતી સરકાર આ ગ્રાઉન્ડ લેવલ પર કામ કરતી મહિલાઓની વાસ્તવિક સમસ્યાઓ સાંભળશે કે કેમ.