અમદાવાદ : રાજ્યમાં કાળઝાળ ગરમીનો પ્રકોપ યથાવત્ જોવા મળી રહ્યો છે અને ગુજરાતના અંદાજે 64 ટકા વિસ્તારમાં હીટવેવની અસર નોંધાઈ છે. રાજકોટનું તાપમાન દેશમાં સૌથી વધુ નોંધાયું હતું, જ્યાં પારો 41.9 ડિગ્રી સુધી પહોંચ્યો હતો. દેશના સૌથી ગરમ 10 શહેરોમાંથી 8 શહેરો ગુજરાતના હોવાનું પણ સામે આવ્યું છે. ઉપરાંત દીવમાં ગરમીનો 100 વર્ષનો રેકોર્ડ તૂટ્યો હોવાનું જણાવાયું છે. જોકે ભારતીય હવામાન વિભાગએ આગાહી કરી છે કે 14 માર્ચથી ગરમીનું જોર ધીમે ધીમે ઘટશે અને તાપમાનમાં લગભગ 2થી 4 ડિગ્રીનો ઘટાડો થશે. આગામી બે દિવસ સુધી ગરમીનું વાતાવરણ યથાવત્ રહેવાની સંભાવના છે.