ગાંધીનગર: ૧૨ માર્ચ, ૨૦૨૬  : ગુજરાત સરકારના નાણા વિભાગ હસ્તકની હિસાબ અને તિજોરી નિયામકની કચેરી દ્વારા પેન્શનરો અને કુટુંબ પેન્શનરો માટે એક અત્યંત રાહતજનક નિર્ણય લેવામાં આવ્યો છે. સામાન્ય રીતે પેન્શનરની પી.પી.ઓ. બુકમાં દર્શાવેલ નામ અને તેમના અન્ય આધાર-પુરાવાઓમાં નામના અંતે લાગતા માનવાચક પ્રત્યયોમાં તફાવત હોવાને કારણે પેન્શન અટકી જતું હોય છે. આ સમસ્યાના કાયમી ઉકેલ માટે સંયુક્ત નિયામક આર. ડી. ખુંટી દ્વારા રાજ્યની તમામ જિલ્લા તિજોરી કચેરીઓ અને પેન્શન ચુકવણા કચેરીઓને લેખિત સૂચના જારી કરવામાં આવી છે.

માનવાચક પ્રત્યયોની વિસંગતતા હવે અવરોધ નહીં બને:
નવા પરિપત્ર મુજબ, જો પેન્શનર અથવા કુટુંબ પેન્શનરના નામમાં માત્ર “ભાઈ”, “કુમાર”, “દાસ”, “લાલ” કે “બેન” જેવા પ્રત્યયો બાબતે જ તફાવત જોવા મળે, તો તેના કારણે તેમનું ચુકવણું રોકી શકાશે નહીં. ઘણીવાર દસ્તાવેજોમાં નામની પાછળ આવા શબ્દો જોડાયેલા હોય છે અથવા નથી હોતા, જેને કારણે પેન્શનરોને વહીવટી પ્રક્રિયામાં હાલાકી ભોગવવી પડતી હતી. હવેથી જો પી.પી.ઓ. બુક અને રજૂ કરેલા પુરાવામાં વ્યક્તિ એક જ છે તેવી ખાતરી થાય, તો જરૂરી ચકાસણી બાદ પેન્શન ચૂકવવાનું રહેશે.

બાંહેધરી અને તિજોરી નિયમોનું પાલન:
આ પ્રક્રિયાને સરળ બનાવવા માટે કચેરીએ સ્પષ્ટ કર્યું છે કે:
 * પી.પી.ઓ. બુક અને પુરાવામાં દર્શાવેલ વ્યક્તિ એક જ હોવા અંગેની જરૂરી બાંહેધરી પેન્શનર પાસેથી મેળવવાની રહેશે.
 * ગુજરાત તિજોરી નિયમ-૨૦૦૦ ના નિયમ-૨૫૭(૧) મુજબ યોગ્ય વ્યક્તિને જ ચુકવણું થઈ રહ્યું છે તેની ખાતરી તિજોરી અધિકારીએ કરવાની રહેશે.
 * નામ સુધારવાની પ્રક્રિયા જટિલ હોવાથી પેન્શનરોને અનાવશ્યક હાલાકી ન થાય અને તેઓ પેન્શનથી વંચિત ન રહે તે સુનિશ્ચિત કરવાનું રહેશે.

પેન્શનરોના હિતમાં મહત્વનું પગલું
કચેરીએ નોંધ્યું છે કે નામ સુધારવાની પ્રક્રિયા ખૂબ જ સમય માંગી લે તેવી હોય છે, જેના પરિણામે પેન્શનરોને આર્થિક મુશ્કેલીનો સામનો કરવો પડે છે. આથી, ચુકવણામાં થતો વિલંબ ટાળી શકાય તે હેતુથી આ માર્ગદર્શન આપવામાં આવ્યું છે. આ નિર્ણય અંગે નિયામક દ્વારા મંજૂરી મેળવવામાં આવી છે, જેનો અમલ તત્કાલ અસરથી રાજ્યની તમામ તિજોરી કચેરીઓમાં કરવાનો રહેશે.