ગાંધીનગર: રાજ્યના પાટનગર ગાંધીનગરમાં આવેલી મહત્વની સરકારી કચેરીઓના સંકુલ 'કર્મયોગી ભવન'ને બોમ્બથી ઉડાવી દેવાની ધમકી મળતા વહીવટી તંત્ર અને પોલીસ કાફલો હરકતમાં આવ્યો છે. કર્મયોગી ભવનના બ્લોક નંબર ૨ માં કાર્યરત તોલ-માપ વિભાગની કચેરીને એક અનામી ધમકીભર્યો ઈમેલ મળતા જ સમગ્ર કેમ્પસમાં ફફડાટ વ્યાપી ગયો હતો.
કર્મચારીઓમાં ડરનો માહોલ, બિલ્ડિંગ ખાલી કરાવાયું
મળતી વિગતો અનુસાર, તોલ-માપ વિભાગના સત્તાવાર ઈમેલ આઈડી પર ભવનને ઉડાવી દેવાની ગંભીર ધમકી મળતા જ ઉચ્ચ અધિકારીઓને જાણ કરવામાં આવી હતી. સાવચેતીના પગલે તુરંત જ સાયરન વગાડીને તમામ કર્મચારીઓને કચેરીની બહાર નીકળી જવા સૂચના અપાઈ હતી. જોતજોતામાં આખું કર્મયોગી ભવન ખાલી કરાવી દેવામાં આવ્યું હતું અને સેંકડો કર્મચારીઓ ભયના માર્યા બિલ્ડિંગની બહાર એકઠા થઈ ગયા હતા.
સુરક્ષા એજન્સીઓ દ્વારા સઘન તપાસ
ધમકીની જાણ થતા જ ગાંધીનગર પોલીસની વિવિધ ટીમો સહિત ઉચ્ચ અધિકારીઓ ઘટનાસ્થળે દોડી આવ્યા હતા. બિલ્ડિંગને ચારે બાજુથી કોર્ડન કરી લેવામાં આવ્યું છે. બોમ્બ ડિસ્પોઝલ સ્ક્વોડ (BDS) અને ડોગ સ્ક્વોડની મદદથી બ્લોક નંબર ૨ ના ખૂણેખૂણામાં સર્ચ ઓપરેશન હાથ ધરવામાં આવ્યું છે. આ ઈમેલ કયા સર્વરથી અને કોના દ્વારા મોકલવામાં આવ્યો છે તે જાણવા માટે સાયબર ક્રાઈમની ટીમ પણ તપાસમાં જોડાઈ છે.
ધમકીભર્યા ઈમેલનો વધતો જતો વ્યાપ
નોંધનીય છે કે, છેલ્લા કેટલાક સમયથી રાજ્યમાં મહત્વની સરકારી અને જાહેર સંસ્થાઓને આ પ્રકારે નિશાન બનાવવાની ઘટનાઓ વધી રહી છે. અગાઉ વિવિધ જિલ્લાઓની પોસ્ટ ઓફિસો, પાસપોર્ટ ઓફિસો અને શૈક્ષણિક સંસ્થાઓને પણ બોમ્બથી ઉડાવી દેવાની ખોટી ધમકીઓ (Hoax Calls/Emails) મળી ચૂકી છે. હાલમાં તોલ-માપ વિભાગને મળેલો આ ઈમેલ કોઈનું તોફાન છે કે કોઈ મોટું ષડયંત્ર, તે દિશામાં પોલીસ તપાસ કરી રહી છે. મોડી સાંજ સુધી સર્ચ ઓપરેશન ચાલુ રહેવાની શક્યતા છે.