તા. ૫ સપ્ટેમ્બર ર૦ર૫ વિક્રમ સંવત ર૦૮૧ ભાદરવો સુદ – ૧૩ શુક્રવાર
ઇન્ડિયન કોસ્ટગાર્ડ આત્મનિર્ભર ભારતની એક વિશેષ ઓળખ બન્યું છે : ભુપેન્દ્રભાઇ પટેલ
તટરક્ષક દળના ૫૦ વર્ષ પૂર્ણ થતાં ‘ઇન્ડિયન કોસ્ટગાર્ડ-ધ રીયલ હિરોઝ ઓફ ઇન્ડિયા' વિડીયો બુક અને ડોક્યુમેન્ટરીનું વિમોચન : પોલીસ અને મરીન ટાસ્કફોર્સના સંયુક્ત ઓપરેશનથી ડ્રગ્સને દરિયાઇ માર્ગેથી આવતુ અટકાવવા સફળતા મળી છે : ડો.કે.એન.એલ.રાવ
રાજકોટ : મુખ્યમંત્રી શ્રી ભૂપેન્દ્રભાઇ પટેલે તટ રક્ષક દળના ૫૦ વર્ષ પૂર્ણ થવાના ઉજવણી અવસરે ‘ઇન્ડિયન કોસ્ટ ગાર્ડ-ધ રીયલ હિરોઝ ઓફ ઇન્ડિયા' વિડીયો બુક અને ડોકયુમેન્ટરીનું ગાંધીનગરમાં વિમોચન કર્યું હતું.
મુખ્યમંત્રીશ્રીએ ઈન્ડિયન કોસ્ટગાર્ડ પોતાનો ધ્યેય મંત્ર ‘વયમ રક્ષામઃ'ને સમુદ્રી સુરક્ષા મજબૂત બનાવવા આપત્તિ સમયે ઝડપી રાહત અને બચાવ કામગીરી તથા સમુદ્રી પર્યાવરણના સંરક્ષણ માટેની પ્રતિબદ્ધતાથી ચરિતાર્થ કરે છે તેને બિરદાવી હતી.
તેમણે કહ્યું કે, આપત્તિના સમયે જ્યારે પોતાને માથે મોત ઊભું હોય ત્યારે પોતાના જીવની પરવાહ કર્યા વિના સામાન્ય અને સંકટમાં ફસાયેલા માનવીનો જીવ બચાવવા હંમેશા તત્પર આ તટ રક્ષકો કાયમ માટે રીયલ હીરોઝ બની રહેવાના છે.
પાછલા ૫૦ વર્ષોમાં ઈન્ડિયન કોસ્ટગાર્ડ દ્વારા રાષ્ટ્રની દરિયાઈ સીમા સુરક્ષાના અનેક ઉતકળષ્ટ ઉદાહરણો પ્રસ્થાપિત થયા છે અને ઈન્ડિયન કોસ્ટગાર્ડ આત્મનિર્ભર ભારતની એક વિશેષ ઓળખ બન્યું છે તેમ તેમણે જણાવ્યું હતું.
મુખ્યમંત્રી શ્રી ભૂપેન્દ્રભાઇ પટેલે કોસ્ટ્ગાર્ડ ગુજરાત પોલીસની એ.ટી.એસ. સાથેના સંકલનમાં રહીને દરિયાઈ માર્ગેથી ડ્રગ્સની ઘુસણખોરી અટકાવવા સતર્ક રહિને મહત્વપૂર્ણ ભૂમિકા નિભાવે છે. તેને પણ બિરદાવી હતી. ઈન્ડિયન કોસ્ટગાર્ડ સમુદ્ર કિનારાથી લઈને ૨૦૦ નોટિકલ માઈલ સુધી સમુદ્ર વિસ્તારમાં ફરજરત રહિને ઈન્ડિયન નેવી અને સ્ટેટ મરીન પોલીસ વચ્ચે મહત્વની કડી બન્યું છે તેમ તેમણે ઉમેર્યુ હતું.
મુખ્યમંત્રીશ્રીએ કહ્યું કે, વરિષ્ઠ પત્રકાર ડૉ. વિવેક ભટ્ટે પોતાની આ વિડીયો બુક અને ડોકયુમેન્ટરી દ્વારા તટરક્ષક દળની શૌર્ય ગાથાને વ્યાપક રીતે લોકો સુધી પહોંચાડવાનું રાષ્ટ્રપ્રેમનું કાર્ય કર્યું છે.
વિધાનસભા અધ્યક્ષ શ્રી શંકરભાઈ ચૌધરીએ સરહદી વિસ્તારોમાં જેમ બી.એસ.એફ. દિવસ-રાત નિગરાની રાખે છે તેમ સમુદ્રી વિસ્તારમાં ઈન્ડિયન કોસ્ટગાર્ડ સતત બાજ નઝર રાખીને તૈનાત રહ્યું છે તે માટે અભિનંદન આપ્યા હતા. તેમણે ઓપરેશન સિંદૂર સમયે કોસ્ટગાર્ડ દ્વારા સમુદ્રી સીમા સાચવવા માટે જે સેવાઓ આપવામાં આવી હતી તેની પણ પ્રસંશા કરી હતી.
પોલીસ મહાનિર્દેશક ડૉ. કે.એન.એલ. રાવે આ પ્રસંગે કહ્યું કે, રાજ્યના વિશાળ દરીયા કિનારાની સુરક્ષા અને સલામતિ માટે ૨૨ મરીન પોલીસ સ્ટેશન્સ અને મરીન ટાસ્કફોર્સના ૫૦૦થી વધુ જવાનો કોસ્ટગાર્ડ સાથે ખભે ખભા મીલાવીને ફરજ બજાવે છે. સંયુક્ત ઓપરેશનથી ડ્રગ્સને દરીયાઈ માર્ગેથી આવતુ અટકાવવાની સફળતા પણ મેળવી છે.
કોસ્ટગાર્ડના આઈ.જી. શ્રી ડી. શષીકુમારે ૫૦ વર્ષની ઉજવણીના આ અવસરને ગરીમામય ગણાવતા કહ્યું કે, આ ૫૦ વર્ષોમાં ભારતીય તટરક્ષક દળ દેશના દરીયાકાંઠાની સુરક્ષાની અડગ ઢાલ બન્યુ છે એટલુ જ નહિ, વાવાઝોડું, વરસાદ, દરીયાઈ તુફાન જેવા વિપદાના સમયે સ્થાનિક પ્રશાસનની મદદમાં રહિને બચાવ અને રાહત કામગીરીમાં પણ મોખરે રહે છે. તેમણે ઈન્ડિયન કોસ્ટગાર્ડને ગુજરાત સરકાર દ્વારા મળી રહેલા સહયોગની સરાહના કરતાં મુખ્યમંત્રીશ્રીનો આભાર વ્યક્ત કર્યો હતો.
પુસ્તકના લેખક ડૉ. વિવેક ભટ્ટે સૌને આવકારતા પાછલા ૨૩ વર્ષોથી દર વર્ષે સરહદ પર જઈને ભારતીય સેનાઓ અને જવાનોનું મનોબળ વધારતી જે રોમાંચક ગાથાઓ લખી છે તેની ભૂમિકા આપી હતી અને તટરક્ષક પરનું તેમનું આ પુસ્તક દેશના યુવાઓ અને આવનારી પેઢી માટે રાષ્ટ્ર પ્રેમનું ઉદાહરણ બનશે તેવો વિશ્વાસ વ્યક્ત કર્યો હતો.
આ પ્રસંગે રાજ્ય મંત્રી મંડળના મંત્રીશ્રીઓ, મુખ્ય સચિવ શ્રી એમ.કે.દાસ તથા કોસ્ટગાર્ડ અને પોલીસના વરિષ્ઠ અધિકારીઓ અને આમંત્રીતો ઉપસ્થિત રહ્યા હતા
(2:17 PM IST)
છેલ્લા 8 દિવસમાં સૌથી લોકપ્રિય 
