પાલનપુર: બનાસકાંઠા જિલ્લામાં હવામાનમાં આવેલા અચાનક પલટા અને કમોસમી વરસાદે ખેડૂતોની કમર તોડી નાખી છે. ખાસ કરીને સરહદી પંથકના ખેતરોમાં અત્યારે તમાકુનો પાક તૈયાર હતો, ત્યારે જ વરસેલા માવઠાએ ખેડૂતોની આખી સીઝન નિષ્ફળ બનાવી દીધી છે. જિલ્લાના નાગફણા સહિતના ગ્રામ્ય વિસ્તારોમાં તમાકુના છોડ ખેતરમાં જ ભીંજાઈ જતા હવે તે સડી જવાની ભીતિ સેવાઈ રહી છે.
૭૦ થી ૮૦ ટકા પાક પલળી ગયો
સ્થાનિક ખેડૂતોના જણાવ્યા અનુસાર, આ વર્ષે તમાકુનો પાક ખૂબ જ સારો હતો અને ખેડૂતોને સારી કમાણીની આશા હતી. પરંતુ અચાનક ત્રાટકેલા વરસાદને કારણે ૭૦ થી ૮૦ ટકા જેટલો પાક પલળી ગયો છે. તમાકુ એક એવો પાક છે જેમાં ભેજ લાગતા જ તેની ગુણવત્તા બગડી જાય છે અને તે કાળો પડીને સડી જાય છે. આ પરિસ્થિતિમાં ખેડૂતોને હવે બજારમાં ભાવ મળવાની કોઈ શક્યતા દેખાતી નથી.
ખેડૂતોની આર્થિક સ્થિતિ કફોડી
માવઠાના કારણે ખેડૂતોની આખા વર્ષની મહેનત અને બિયારણ-ખાતર પાછળ કરેલો ખર્ચ માથે પડ્યો છે. ખેડૂતોનું કહેવું છે કે વારંવાર બદલાતા હવામાન અને કુદરતી આફતોને કારણે તેઓ દેવાના ડુંગર નીચે દબાતા જાય છે. નાગફણા ગામના ખેડૂતોની આંખોમાં અત્યારે લાચારી જોવા મળી રહી છે, કારણ કે તેમની નજર સામે જ તેમનો 'સોના' જેવો પાક કચરો બની રહ્યો છે.
સર્વે અને વળતરનો પોકાર
કુદરતી આફતનો ભોગ બનેલા બનાસકાંઠાના ખેડૂતોએ હવે સરકાર સામે નજર માંડી છે. ખેડૂતોની માંગ છે કે કૃષિ વિભાગ દ્વારા તાત્કાલિક ધોરણે નુકસાનીનો સર્વે કરવામાં આવે અને નિયમ મુજબ યોગ્ય વળતર ચૂકવવામાં આવે. જો સરકાર દ્વારા વહેલી તકે સહાય આપવામાં નહીં આવે, તો અનેક ખેડૂત પરિવારો આર્થિક સંકટમાં ફસાઈ જશે તેવી ભયાનક સ્થિતિ સર્જાઈ છે.