સુરત :  ડાયમંડ સિટી સુરતમાં રવિવારની રાત્રે રાજકીય માહોલ અચાનક ગરમાઈ ગયો હતો. ગુજરાતના મુખ્યમંત્રી ભૂપેન્દ્ર પટેલ કોઈ પણ પૂર્વ નિર્ધારિત કાર્યક્રમ વિના અચાનક સુરત સર્કિટ હાઉસ ખાતે આવી પહોંચતા સ્થાનિક નેતાગીરીમાં દોડધામ મચી ગઈ હતી. આગામી સમયમાં યોજાનારી સુરત મહાનગરપાલિકાની ચૂંટણીને લઈને ભાજપ હાઈકમાન્ડ અત્યારથી જ એક્શન મોડમાં આવી ગયું હોય તેમ જણાય છે. મુખ્યમંત્રીએ મધરાતે યોજેલી આ 'સરપ્રાઈઝ' બેઠક આગામી ચૂંટણીના રણશિંગા સમાન માનવામાં આવી રહી છે.
સર્કિટ હાઉસમાં ૯૦ હોદ્દેદારોનો જમાવડો
સુરત સર્કિટ હાઉસ ખાતે યોજાયેલી આ મહત્વની બેઠકમાં શહેર ભાજપના પ્રમુખ, હોદ્દેદારો અને કોર્પોરેટરો મળીને અંદાજે ૯૦ જેટલા અગ્રણીઓ હાજર રહ્યા હતા. મુખ્યમંત્રીએ દરેક વોર્ડની પરિસ્થિતિનો તાગ મેળવ્યો હતો અને તમામ કોર્પોરેટરોને પ્રજાના પ્રશ્નોને પ્રાથમિકતા આપીને ઉકેલવા માટે કડક સૂચનાઓ આપી હતી. બેઠકમાં ખાસ કરીને સરકારી યોજનાઓ લોકો સુધી પહોંચાડવા અને આંતરિક વિખવાદોને બાજુ પર મૂકીને સંગઠનને મજબૂત કરવા પર ભાર મૂકવામાં આવ્યો હતો.
ચૂંટણી પૂર્વે સંગઠનને મજબૂત કરવાનો લક્ષ્યાંક
મુખ્યમંત્રીનું સુરતમાં રાત્રિ રોકાણ કરવું એ સૂચવે છે કે ભાજપ માટે સુરત મનપાની ચૂંટણી ખૂબ જ મહત્વની છે. સુરતમાં વિપક્ષની મજબૂતી અને ભૂતકાળના પરિણામોને ધ્યાને રાખીને મુખ્યમંત્રીએ જાતે જ રણનીતિની કમાન સંભાળી હોય તેવું લાગી રહ્યું છે. આ બેઠક બાદ હવે સુરત ભાજપમાં નવા ઉત્સાહ સાથે ચૂંટણી લક્ષી તૈયારીઓ તેજ બને તેવા પૂરેપૂરા સંકેત છે.
સુરતથી વલસાડ તરફ પ્રયાણ
મુખ્યમંત્રી આજે રાત્રે સુરતમાં જ રોકાણ કરશે અને આવતીકાલે સવારે વલસાડ જવા રવાના થશે. વલસાડ જિલ્લામાં તેઓ વિવિધ સામાજિક અને સરકારી કાર્યક્રમોમાં હાજરી આપવાના છે. જોકે, વલસાડના પ્રવાસ પહેલા સુરતમાં આ પ્રકારે ગુપ્ત બેઠક યોજવી એ રાજકીય વિશ્લેષકો માટે ચર્ચાનો વિષય બન્યો છે. જનતામાં એવી ચર્ચા છે કે આગામી દિવસોમાં સુરત મનપાના વહીવટમાં મોટા ફેરફારો અથવા આકરા નિર્ણયો જોવા મળી શકે છે.