સુરત તા.૨૨

સુરત શહેર અત્યારે ડ્રગ્સ અને નશીલા પદાર્થો વિરુદ્ધની લડતમાં સખત બન્યું છે, ત્યારે ઉધના વિસ્તારમાં પોલીસને મોટી સફળતા મળી છે. ચોંકાવનારી વાત એ છે કે આ ગેરકાયદેસર પ્રવૃત્તિમાં બે સગીર વયના કિશોરો સંડોવાયેલા જોવા મળ્યા છે. ઉધના પોલીસે બાતમીના આધારે દરોડો પાડી લાખોની કિંમતનો ગાંજાનો જથ્થો જપ્ત કરી કાયદેસરની કાર્યવાહી હાથ ધરી છે.

મળતી માહિતી મુજબ, સુરતના ઉધના વિસ્તારમાં નશીલા પદાર્થોની હેરાફેરી થતી હોવાની બાતમી ઉધના પોલીસને મળી હતી. સતર્ક બનેલી પોલીસે વોચ ગોઠવીને શંકાસ્પદ હાલતમાં બે કિશોરોની અટકાયત કરી હતી. જ્યારે તેમની તપાસ કરવામાં આવી ત્યારે પોલીસ પણ ચોંકી ઉઠી હતી. આ કિશોરો પાસેથી નશા માટે વપરાતા ગાંજાનો મોટો જથ્થો મળી આવ્યો હતો. પોલીસે તાત્કાલિક અસરથી આ બંને સગીરોની અટકાયત કરી મુદ્દામાલ કબજે કર્યો હતો.

લાખોની કિંમતનો મુદ્દામાલ જપ્ત

પોલીસ તપાસ દરમિયાન આ બંને કિશોરો પાસેથી કુલ 9.08 કિલોગ્રામ ગાંજાનો જથ્થો મળી આવ્યો છે. બજારમાં આ ગાંજાની અંદાજિત કિંમત રૂપિયા 4.54 લાખ આંકવામાં આવી છે. આ ઉપરાંત, તેમની પાસેથી નશાના વેપારમાં વપરાતા મોબાઈલ ફોન પણ મળી આવ્યા છે. ગાંજો અને મોબાઈલ ફોન સહિત પોલીસે કુલ 4.62 લાખનો મુદ્દામાલ જપ્ત કર્યો છે. આટલી નાની ઉંમરે આટલા મોટા જથ્થા સાથે પકડાવું એ સમાજ માટે લાલબત્તી સમાન કિસ્સો છે.

NDPS એક્ટ હેઠળ ગુનો દાખલ

આ મામલે ઉધના પોલીસે બંને કિશોરો વિરુદ્ધ NDPS એક્ટ મુજબ ગુનો નોંધી આગળની તપાસ તેજ કરી છે. પોલીસ હવે એ દિશામાં તપાસ કરી રહી છે કે આ ગાંજાનો જથ્થો ક્યાંથી લાવવામાં આવ્યો હતો અને આ રેકેટમાં અન્ય કયા મોટા માથાઓ સામેલ છે. શું આ કિશોરો માત્ર કેરિયર તરીકે કામ કરતા હતા કે પછી તેમની પાછળ કોઈ મોટી ગેંગ સક્રિય છે, તે જાણવા માટે પોલીસ રિમાન્ડ અને પૂછપરછની પ્રક્રિયા કરી રહી છે.

સગીરોમાં વધતું નશાનું પ્રમાણ વ ચિંતાનો વિષય

સુરત જેવા ઔદ્યોગિક શહેરમાં ડ્રગ્સ માફિયાઓ હવે સગીરોનો ઉપયોગ કરીને પોતાનો કાળો કારોબાર ફેલાવી રહ્યા હોય તેવું પ્રતીત થાય છે. આ ઘટનાએ વાલીઓ અને તંત્ર માટે ચિંતા જગાવી છે. પોલીસ કમિશનર દ્વારા 'નો ડ્રગ્સ ઇન સુરત' અભિયાન હેઠળ સતત કાર્યવાહી કરવામાં આવી રહી છે, છતાં પણ ગુનેગારો અવનવી તરકીબો અજમાવી રહ્યા છે. ઉધના પોલીસની આ કામગીરીથી નશાના સોદાગરોમાં ફફડાટ વ્યાપી ગયો છે.