રાજકોટ: ગુજરાત ઇલેક્ટ્રિસિટી રેગ્યુલેટરી કમિશન (જીઇઆરસી), ગાંધીનગર દ્વારા આજ રોજ આગામી નાણાકીય વર્ષ માટેના ટેરિફ અંગે સત્તાવાર પ્રેસનોટ જારી કરવામાં આવી છે. આ જાહેરાત મુજબ, આગામી નાણાકીય વર્ષ ૨૦૨૬/૨૭ માટે રાજ્યની સરકારી વીજ વિતરણ કંપનીઓ અને ટોરેન્ટ પાવર લિમિટેડ (અમદાવાદ, ગાંધીનગર અને સુરત વિસ્તાર) ના વીજ દરોમાં કોઈ જ ફેરફાર કે વધારો કરવામાં આવ્યો નથી. ગ્રાહકો માટે આ નવા સ્થિર દરો ૧ એપ્રિલ ૨૦૨૬ લાગુ પડશે.

આ નિર્ણય લેતા પહેલા કમિશન દ્વારા પારદર્શક પ્રક્રિયા હાથ ધરવામાં આવી હતી. વીજ કંપનીઓને તેમની અરજીઓ અખબારોમાં પ્રકાશિત કરવા જણાવાયું હતું. ત્યારબાદ ચોવીસમી અને પચ્ચીસમી ફેબ્રુઆરી, બે હજાર છવ્વીસના રોજ જાહેર સુનાવણીઓ યોજવામાં આવી હતી, જેમાં વિવિધ સંસ્થાઓ અને નાગરિકોએ પોતાના સૂચનો રજૂ કર્યા હતા. આ તમામ રજૂઆતો ધ્યાને લીધા બાદ જ કમિશને અંતિમ નિર્ણય જાહેર કર્યો છે.

સરકારી વીજ કંપનીઓના ગ્રાહકો માટે લેવાયેલા મહત્વના નિર્ણયોમાં, પ્રીપેડ સ્માર્ટ મીટરની સુવિધા અપનાવનાર ગ્રાહકોને એનર્જી ચાર્જ પર મળતું બે ટકાનું રિબેટ વધારીને ત્રણ ટકા કરવામાં આવ્યું છે. 

ટાઇમ ઓફ યુઝ (ટીઓયુ) ડિસ્કાઉન્ટનો લાભ હવે પોસ્ટપેડ બિલિંગ ધરાવતા સ્માર્ટ મીટર ગ્રાહકોને પણ મળશે. દિવસે સસ્તા સોલાર પાવરનો મહત્તમ લાભ લોકોને મળે તે હેતુથી, સાઠ પૈસા પ્રતિ યુનિટનું આ ડિસ્કાઉન્ટ હવે સવારે અગિયાર વાગ્યાથી સાંજના પાંચ વાગ્યા સુધી એટલે કે કુલ છ કલાક માટે લાગુ પડશે, જે અગાઉ માત્ર ચાર કલાક માટે જ સીમિત હતું. 

વોટરવર્ક્સ કનેક્શન માટે પચાસ એચપીની મર્યાદા દૂર કરીને તમામ જોડાણોને આ લાભ આપવામાં આવ્યો છે. 

પર્યાવરણને અનુકૂળ ગ્રીન પાવર ટેરિફ ૦.૯૦ રૂપિયાથી ઘટાડીને ૦.૭૫ રૂપિયા પ્રતિ યુનિટ કરવામાં આવ્યો છે.