ગાંધીનગર: ગાંધીનગરની સંસ્કૃતિ સંસ્થા દ્વારા તાજેતરમાં ૨૫-૦૩-૨૦૨૬ના રોજ શહેરના ટાઉનહોલ ખાતે “આ અબ લોટ ચાલે” શીર્ષક હેઠળ એક અવિસ્મરણીય સંગીતમય કાર્યક્રમનું ભવ્ય આયોજન કરવામાં આવ્યું હતું. પ્રખ્યાત ગાયક મુકેશજીના કંઠે ગવાયેલા વૈયક્તિક અને યુગલ ગીતોની આ સંગીત સંધ્યાએ ગાંધીનગરના સંગીતપ્રેમીઓને ભાવનાત્મક સફર કરાવી સુવર્ણ યુગના સ્મરણો જીવંત કર્યા હતા.

મુખ્તાર શાહના અવાજમાં મુકેશજીની સજીવતા:
આ કાર્યક્રમમાં મુખ્ય આકર્ષણ તરીકે “ગોલ્ડન વોઈસ ઓફ મુકેશ” તરીકે જાણીતા ગાયક મુખ્તાર શાહ રહ્યા હતા. તેમણે મુકેશજીના અમર ગીતોને પોતાના મધુર અને લાગણીસભર અવાજમાં એવી રીતે રજૂ કર્યા કે સમગ્ર હોલ મંત્રમુગ્ધ થઈ ગયો હતો. ખાસ કરીને “જાને કહાં ગયે વો દિન” અને “તારો મેં સજકે, અપને સૂરજ સે..” જેવા સદાબહાર ગીતોની રજૂઆત વખતે શ્રોતાઓએ તાળીઓના ગડગડાટ સાથે વાતાવરણને ગજવી મૂક્યું હતું.

યુગલ ગીતો અને હાસ્યસભર સંચાલન:
આ સંગીતયાત્રામાં ગાયિકા કેયા પાટિલ અને દેવાંશી શાહે પણ સુંદર સહભાગિતા આપી હતી, જેના કારણે મુકેશજીના પ્રખ્યાત યુગલ ગીતો વધુ મોહક અને મધુર બન્યા હતા. સંગીતના આ સુમેળભર્યા કાર્યક્રમનું સંચાલન અરવિંદ શુકલ દ્વારા કરવામાં આવ્યું હતું, જેમણે પોતાની આગવી અને હાસ્યસભર શૈલીથી શ્રોતાઓને અંત સુધી જકડી રાખ્યા હતા.

સંસ્કાર અને સંસ્કૃતિનું સંવર્ધન:
સંસ્કૃતિ સંસ્થા છેલ્લા ઘણા વર્ષોથી સંગીત, કલા અને સંસ્કૃતિના ક્ષેત્રે મહત્વનું યોગદાન આપી રહી છે. સંસ્થાના પ્રમુખ રમેશભાઈ પટેલે જણાવ્યું હતું કે, સંસ્થાનો ઉદ્દેશ્ય નવી પેઢીને ભારતીય સંગીત વારસાની ઓળખ આપવાનો અને વરિષ્ઠ પેઢીને સોનેરી ક્ષણો જીવવાનો અવસર પૂરો પાડવાનો છે. કાર્યક્રમની સફળતા બાદ અનેક સંગીતપ્રેમીઓએ સંસ્થાના સભ્ય બનવા માટે ઉત્સુકતા દર્શાવી હતી. રમેશભાઈ પટેલે તમામ નાગરિકોને આ સાંસ્કૃતિક પરિવારનો ભાગ બની અમૂલ્ય વારસાને જીવંત રાખવા માટે સંસ્થા સાથે જોડાવા અનુરોધ કર્યો હતો.