વડોદરા: તા.૨૮: વડોદરાના રેલવે મુસાફરો માટે આજે એક ઐતિહાસિક દિવસ છે. વડોદરા રેલવે સ્ટેશનના પ્લેટફોર્મ નંબર-1 પર અત્યાધુનિક 'હાઈટેક ડિજિટલ લોન્જ'નો પ્રારંભ કરવામાં આવ્યો છે. આ સાથે જ વડોદરા સ્ટેશન ગુજરાતનું પ્રથમ અને ભારતનું બીજા ક્રમનું એવું સ્ટેશન બન્યું છે જ્યાં મુસાફરોને રેલવેના ભાડામાં એરપોર્ટ જેવો લક્ઝુરિયસ અનુભવ મળશે.
આ ડિજિટલ લોન્જનું ઉદ્ઘાટન વડોદરાના સાંસદ હેમાંગ જોશી અને ધારાસભ્ય કેયુર રોકડિયાના હસ્તે કરવામાં આવ્યું હતું. વડાપ્રધાન નરેન્દ્ર મોદીના 'ડિજિટલ ઇન્ડિયા'ના વિઝનને સાકાર કરતી આ લોન્જમાં પ્રીમિયમ સીટિંગ, હાઈ-સ્પીડ વાઈ-ફાઈ અને શાંત વાતાવરણ ઉપલબ્ધ કરાવવામાં આવ્યું છે. ખાસ કરીને બિઝનેસ ટ્રાવેલર્સ માટે અહીં ખાસ કોન્ફરન્સ રૂમની વ્યવસ્થા કરવામાં આવી છે, જેથી તેઓ મુસાફરી દરમિયાન પણ પોતાની મિટિંગો કરી શકે.
 
શું હશે ચાર્જ અને સુવિધાઓ?
મુસાફરો માટે આ લોન્જમાં પ્રવેશ અને અન્ય સુવિધાઓ માટે પોસાય તેવા દર નક્કી કરવામાં આવ્યા છે:
•    એન્ટ્રી ચાર્જ: માત્ર ₹૨૦૦ (૧ કલાક માટે)
•    આરામદાયક રોકાણ: ₹૭૦૦ (૨ કલાક માટે)
•    કોન્ફરન્સ રૂમ: ₹૧,૬૮૦ (વ્યાપારી મિટિંગો માટે)
લોન્જની અંદરની સજાવટ અને સુવિધાઓ એટલી આધુનિક છે કે તમને રેલવે સ્ટેશન પર હોવાનો અહેસાસ જ નહીં થાય. DRM સહિતના ઉચ્ચ અધિકારીઓની હાજરીમાં શરૂ થયેલી આ સુવિધા વડોદરાની શાનમાં વધારો કરશે. હવે ટ્રેનની રાહ જોવી એ કંટાળાજનક નહીં, પણ એક આરામદાયક અને યાદગાર અનુભવ બની રહેશે.
વડોદરા રેલવે સ્ટેશન હવે માત્ર મુસાફરીનું માધ્યમ નહીં, પણ આધુનિક સુવિધાઓનું નવું સરનામું બની ગયું છે. આ નવી સુવિધાને લઈને સ્થાનિક પ્રવાસીઓમાં ભારે ઉત્સાહ જોવા મળી રહ્યો છે.