અમદાવાદ: ગુજરાતમાં સ્થાનિક સ્વરાજની ચૂંટણીનો શંખનાદ ફૂંકાવા જઈ રહ્યો છે ત્યારે અમદાવાદના રાજકીય ગલિયારાઓમાં ભારે ફફડાટ જોવા મળી રહ્યો છે. ભાજપ આ વખતે અમદાવાદ મહાનગરપાલિકામાં મોટા પાયે 'સર્જરી' કરવાની તૈયારીમાં હોય તેમ જણાય છે. સૂત્રોના જણાવ્યા અનુસાર, પક્ષ આ વખતે લગભગ 50 ટકા જેટલા વર્તમાન કાઉન્સિલરોને ઘરનો રસ્તો બતાવી શકે છે. એટલે કે, કુલ 160 કોર્પોરેટરોમાંથી આશરે 75 જેટલા દિગ્ગજોની ટિકિટ કપાઈ જવાની પૂરેપૂરી શક્યતા છે.
 
કેમ કપાઈ શકે છે દિગ્ગજોની ટિકિટ?
પક્ષ દ્વારા ટિકિટ વિતરણ માટે આ વખતે કેટલીક કડક ગાઈડલાઈન નક્કી કરવામાં આવી હોવાનું ચર્ચાઈ રહ્યું છે:
•    વય મર્યાદાનો બાધ: પક્ષમાં 32 જેટલા કાઉન્સિલરો એવા છે જેઓ સતત ત્રણ ટર્મ પૂરી કરી ચૂક્યા છે અને 60 વર્ષની વય મર્યાદા વટાવી ગયા છે. પક્ષના નવા નિયમો મુજબ આવા નેતાઓને ફરી તક મળવી મુશ્કેલ છે.
•    નબળું રિપોર્ટ કાર્ડ: જે કોર્પોરેટરો સામે વિકાસ કામોમાં બેદરકારી, ભ્રષ્ટાચારના આક્ષેપો અથવા જનતામાં નારાજગી જોવા મળી છે, તેમને પક્ષ ફરીથી મેદાને ઉતારવાનું જોખમ લેવા માંગતો નથી.
•    નવા ચહેરાઓને પ્રાધાન્ય: સંગઠનને વધુ મજબૂત અને ગતિશીલ બનાવવા માટે ભાજપ આ વખતે યુવા કાર્યકરો અને શિક્ષિત ચહેરાઓને આગળ લાવવાની રણનીતિ પર કામ કરી રહ્યું છે.
 
કાઉન્સિલરોમાં દોડધામ, સેન્સ પ્રક્રિયા પહેલા જ લોબિંગ તેજ
ચૂંટણીની જાહેરાત પૂર્વે જ વર્તમાન કાઉન્સિલરો પોતાના વિસ્તારમાં અચાનક સક્રિય થઈ ગયા છે. રસ્તા, ગટર અને પાણીની ફરિયાદો ઉકેલવા માટે દોડધામ શરૂ થઈ ગઈ છે. બીજી તરફ, ટિકિટ મેળવવા માટે પક્ષના પ્રદેશ અને રાષ્ટ્રીય કક્ષાના નેતાઓ સુધી પહોંચવા માટે લોબિંગ તેજ બન્યું છે.
 
શહેરના રાજકારણ પર શું થશે અસર?
પક્ષનો આ સંભવિત નિર્ણય સ્થાપિત હિતો માટે મોટો ઝટકો સાબિત થઈ શકે છે, પરંતુ નવા અને ઉત્સાહી કાર્યકરો માટે સોનેરી તક લઈને આવશે. જો મોટા પાયે ટિકિટો કપાશે, તો પક્ષમાં આંતરિક અસંતોષ ઉભો ન થાય તે જોવું પણ હાઈકમાન્ડ માટે એક પડકાર રહેશે.