વડોદરા:ગુજરાતમાં દારૂબંધીના કડક અમલ વચ્ચે વડોદરા ગ્રામ્ય પોલીસની હદમાં સ્ટેટ મોનિટરિંગ સેલ (SMC) એ એક મોટી સફળતા હાંસલ કરી છે. નંદેસરી પોલીસ સ્ટેશન વિસ્તારમાં આવતા રઢિયાપુરા ગામે મધરાતે એસએમસીની ટીમે ચોક્કસ બાતમીના આધારે દરોડો પાડીને વિદેશી દારૂના મસમોટા જથ્થા સાથે ગુજરાતના કુખ્યાત બુટલેગર મનોજ પાપડને રંગેહાથ ઝડપી લીધો છે. જે સમયે ખેતરમાં કન્ટેનરમાંથી દારૂ ખાલી કરી અન્ય નાના વાહનોમાં હેરાફેરી (કટીંગ) કરવામાં આવી રહી હતી, ત્યારે જ વિજિલન્સના કાફલાએ ચારે તરફથી ઘેરો ઘાલતા બુટલેગરોમાં નાસભાગ મચી ગઈ હતી.
લાખોનો દારૂ અને કન્ટેનર જપ્ત
સ્ટેટ મોનિટરિંગ સેલની ટીમે રઢિયાપુરા ગામના સીમ વિસ્તારમાં આવેલા એક ખેતરમાં દરોડો પાડતા ત્યાંથી વિદેશી દારૂની ૬૦૦થી વધુ પેટીઓ ભરેલું આખું કન્ટેનર મળી આવ્યું હતું. આ જથ્થાની બજાર કિંમત લાખો રૂપિયા આંકવામાં આવી રહી છે. પોલીસ માટે સૌથી મોટી સફળતા એ છે કે આ રેડ દરમિયાન લિસ્ટેડ બુટલેગર મનોજ પાપડ સ્થળ પર હાજર હતો અને પોલીસના સકંજામાં આવી ગયો છે. પ્રાથમિક તપાસમાં બહાર આવ્યું છે કે આટલો મોટો દારૂનો જથ્થો વડોદરા શહેર કે અન્ય જિલ્લાઓમાં પહોંચાડવા માટે મંગાવવામાં આવ્યો હતો.
નંદેસરી પોલીસની કામગીરી શંકાના દાયરામાં
આટલી મોટી માત્રામાં દારૂ ભરેલું કન્ટેનર નંદેસરી પોલીસની હદમાં છેક ગામના ખેતર સુધી પહોંચી ગયું અને સ્થાનિક પોલીસને તેની જરાય ગંધ ન આવી, તે બાબત અત્યારે ટોક ઓફ ધ ટાઉન બની છે. સ્ટેટ વિજિલન્સની આ સીધી કાર્યવાહીને પગલે સ્થાનિક પોલીસની નિષ્ક્રિયતા અથવા બુટલેગરો સાથેની મિલીભગત હોવાની આશંકાઓ પ્રબળ બની છે. આગામી દિવસોમાં આ મામલે જવાબદાર સ્થાનિક પોલીસ અધિકારીઓ સામે કડક કાર્યવાહીના સંકેતો મળી રહ્યા છે.
પૂછપરછમાં મોટા ખુલાસાની સંભાવના
એસએમસી દ્વારા હાલમાં મુદ્દામાલ જપ્ત કરી આગળની કાયદેસરની કાર્યવાહી હાથ ધરવામાં આવી છે. ધરપકડ કરાયેલા મનોજ પાપડની સઘન પૂછપરછ શરૂ કરવામાં આવી છે, જેમાં આ દારૂનો જથ્થો ક્યાંથી આવ્યો હતો અને આ નેટવર્કમાં અન્ય કયા મોટા બુટલેગરો સામેલ છે તેની વિગતો બહાર આવે તેવી પૂરેપૂરી શક્યતા છે. આ કેસમાં આગામી સમયમાં વધુ ધરપકડ અને દારૂના મોટા સપ્લાય ચેઈનનો પર્દાફાશ થઈ શકે છે.