​ગાંધીનગર: ગુજરાત રાજ્ય ચૂંટણી આયોગ દ્વારા આગામી ૨૬ એપ્રિલ ૨૦૨૬ના રોજ યોજાનારી સ્થાનિક સ્વરાજ્યની સંસ્થાઓની સામાન્ય અને પેટા ચૂંટણીઓ સંદર્ભે વહીવટી તૈયારીઓને આખરી ઓપ આપી દેવામાં આવ્યો છે. આ ચૂંટણી પ્રક્રિયા મુક્ત અને ન્યાયી વાતાવરણમાં સંપન્ન થાય તે માટે સચિવાલય, ગાંધીનગર ખાતે ખાસ કન્ટ્રોલ રૂમની વ્યવસ્થા કરવામાં આવી છે. રાજ્ય ચૂંટણી આયોગના સચિવ આર. જી. ગોહિલ દ્વારા સત્તાવાર અખબારી યાદી જારી કરીને આ અંગેની વિગતો જાહેર કરવામાં આવી છે.

​કન્ટ્રોલ રૂમ અને સંપર્ક સૂત્રોની જાહેરાત:
​ચૂંટણી દરમિયાન મતદાન અને મતગણતરીના દિવસે કોઈ પણ પ્રકારની વિગતો કે ફરિયાદોના નિકાલ માટે આયોગ દ્વારા નીચે મુજબના સંપર્ક સૂત્રો કાર્યરત કરવામાં આવ્યા છે:
​ટેલિફોન નંબર: 079-23252072, 079-23252073, 079-23258706
​ઈ-મેલ એડ્રેસ: [email protected]

​આ ઉપરાંત, આયોગના ઉચ્ચ અધિકારીઓના ટેલિફોન નંબરો પણ જાહેર કરવામાં આવ્યા છે જેથી ચૂંટણી પ્રક્રિયા પર સીધું નિરીક્ષણ રાખી શકાય.

​ચૂંટણી હેઠળ આવતા વિસ્તારોની વિગત:
​આ અખબારી યાદી મુજબ રાજ્યના ખૂણેખૂણે ચૂંટણીનો માહોલ જોવા મળશે:
૧. ૧૫ મહાનગરપાલિકાઓ: જેમાં મુખ્યત્વે અમદાવાદ, સુરત, વડોદરા, રાજકોટ, જામનગર, ભાવનગર અને જૂનાગઢ જેવી મહાનગરપાલિકાઓની સામાન્ય ચૂંટણી યોજાશે.
૨. ૮૪ નગરપાલિકાઓ: રાજ્યના વિવિધ જિલ્લાઓની કુલ ૮૪ નગરપાલિકાઓમાં મતદાન થશે.
૩. ૩૪ જિલ્લા પંચાયતો અને ૨૬૦ તાલુકા પંચાયતો: ગ્રામ્ય સ્તરે પણ લોકશાહીનો પર્વ ઉજવાશે જેમાં તમામ ૩૪ જિલ્લા પંચાયતો અને ૨૬૦ તાલુકા પંચાયતોનો સમાવેશ થાય છે.
૪. પેટા ચૂંટણી: આ સાથે જ ૧૧ નગરપાલિકાઓની ખાલી પડેલી ૧૩ બેઠકો માટે પણ પેટા ચૂંટણી યોજાવાની છે.

​તાલુકાવાર વિગતો અને આયોજન
​આયોગ દ્વારા જાહેર કરાયેલા પત્રક મુજબ વિવિધ જિલ્લાના તાલુકાઓમાં પણ વ્યાપક આયોજન કરાયું છે:
* ​સાબરકાંઠા: હિંમતનગર, ખેડબ્રહ્મા, પ્રાંતિજ, વિજયનગર, વડાલી, ઇડર, તલોદ અને પોશીના.
* ​સુરત: ઓલપાડ, માંડવી, અરેઠ, કામરેજ, બારડોલી, માંગરોળ, ઉમરપાડા, મહુવા, ચોર્યાસી, અંબિકા અને પલસાણા.
* ​સુરેન્દ્રનગર: દસાડા, ધ્રાંગધ્રા, ચુડા, લખતર, લીંબડી, વઢવાણ, ચોટીલા, સાયલા, મુળી અને થાનગઢ.
* ​બનાસકાંઠા: થરાદ, રાહ, વાવ, ધરણીધર, ભાભર અને સૂઈગામ જેવા વિસ્તારોમાં ચૂંટણી તંત્ર સજ્જ કરવામાં આવ્યું છે.

​રાજ્ય ચૂંટણી આયોગ દ્વારા તમામ કલેક્ટર અને સંબંધિત અધિકારીઓને આ કન્ટ્રોલ રૂમ સાથે સતત સંકલનમાં રહીને ૨૬-૦૪-૨૦૨૬ના રોજ મતદાનની પ્રક્રિયા શાંતિપૂર્ણ રીતે પૂર્ણ કરવા તાકીદ કરવામાં આવી છે.