અમદાવાદ: ગુજરાતમાં આગામી સમયમાં યોજાનારી સ્થાનિક સ્વરાજ્યની ચૂંટણીઓ પૂર્વે જ રાજકીય માહોલ પૂરેપૂરો ગરમાયો છે. ખાસ કરીને વિરોધ પક્ષ કોંગ્રેસે આ વખતે ચૂંટણી મેદાનમાં ઉતરતા પહેલા જ પોતાના ઘરને મજબૂત કરવા અને પક્ષપલટાના દૂષણને ડામવા માટે એક અત્યંત કડક અને અભૂતપૂર્વ રણનીતિ અપનાવી છે. વર્ષોથી ચૂંટણી જીત્યા બાદ સત્તાધારી પક્ષમાં ભળી જતા નેતાઓને રોકવા માટે હવે કોંગ્રેસે માત્ર નૈતિકતા પર ભરોસો રાખવાને બદલે ‘કાયદાકીય કવચ’ તૈયાર કર્યું છે. પક્ષ દ્વારા હવે તમામ ઉમેદવારો પાસેથી ઉમેદવારી ફોર્મની સાથે એક કાયદેસરનું બાહેધરી પત્રક લેવાનો નિર્ણય કરવામાં આવ્યો છે.

હાલમાં રાજ્યભરમાં કોંગ્રેસ દ્વારા ઉમેદવારોની પસંદગી માટે જે સેન્સ લેવાની પ્રક્રિયા ચાલી રહી છે, તેમાં એક નવો જ વળાંક જોવા મળ્યો છે. સેન્સ આપવા આવતા દરેક દાવેદારને પક્ષ તરફથી એક વિશિષ્ટ ડ્રાફ્ટ આપવામાં આવે છે. આ સેન્સ ફોર્મની સાથે જોડવામાં આવેલા બાહેધરી પત્રકમાં સ્પષ્ટ શરતો મૂકવામાં આવી છે કે જો ઉમેદવાર વિજયી થયા બાદ પક્ષ સાથે છેડો ફાડશે અથવા પક્ષપલટો કરશે, તો પક્ષ તેની સામે પક્ષાંતર ધારા (Anti-Defection Law) હેઠળ તાત્કાલિક કાનૂની કાર્યવાહી કરશે. આ લેખિત બાહેધરીનો મુખ્ય ઉદ્દેશ્ય પક્ષપલટુ નેતાઓ સામે કોર્ટમાં મજબૂત પુરાવા રજૂ કરી તેમનું સભ્યપદ રદ કરાવવાનો છે.

કોંગ્રેસના આ આક્રમક વલણ પાછળ ભૂતકાળના કડવા અનુભવો જવાબદાર હોવાનું મનાય છે. અગાઉની વિધાનસભા તેમજ સ્થાનિક સ્વરાજ્યની ચૂંટણીઓમાં અનેક જિલ્લા પંચાયતો, તાલુકા પંચાયતો અને નગરપાલિકાઓમાં કોંગ્રેસના ચૂંટાયેલા પ્રતિનિધિઓ રાતોરાત પક્ષ બદલીને ભાજપમાં જોડાઈ જતાં કોંગ્રેસે હાથમાં આવેલી સત્તા ગુમાવવી પડી હતી. આ રાજકીય પલટીને કારણે કાર્યકરોનું મનોબળ તૂટતું હતું અને જનતાના મતનું પણ અપમાન થતું હતું. આ પ્રકારના નુકસાનને અટકાવવા માટે પ્રદેશ પ્રમુખ અને નિરીક્ષકો દ્વારા આ વખતે ઉમેદવારો પર ‘કાયદાકીય લગામ’ કસવામાં આવી છે.

પક્ષના સૂત્રોના જણાવ્યા અનુસાર, કોંગ્રેસે આ વખતે કાયદાકીય નિષ્ણાતોની એક ખાસ ટીમ પણ તૈયાર રાખી છે. જો કોઈ સભ્ય પક્ષ વિરુદ્ધ જઈને ગદ્દારી કરશે, તો આ ટીમ દ્વારા કોર્ટમાં કાનૂની લડત આપીને તે સભ્યને ગેરલાયક ઠેરવવાની પ્રક્રિયા હાથ ધરવામાં આવશે. આમ, કોંગ્રેસે આ વખતે ‘સેન્સ’ની સાથે ‘સાવધાની’નો માર્ગ અપનાવીને ચૂંટણી પહેલા જ વિરોધીઓ અને પક્ષમાં રહેલા અસંતુષ્ટોને કડક સંદેશો આપી દીધો છે. આ નવા પ્રયોગથી રાજકીય વર્તુળોમાં ભારે ચર્ચા જાગી છે કે શું હવે આ કાયદેસરના દબાણથી પક્ષપલટાના રાજકારણ પર રોક લાગશે કે કેમ.