ગાંધીનગર: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ, ગાંધીનગર દ્વારા તાજેતરમાં યોજાયેલી ગુજરાત કોમન એન્ટરન્સ ટેસ્ટ (ગુજકેટ)-૨૦૨૬ના ઉમેદવારો માટે મહત્વના સમાચાર સામે આવ્યા છે. બોર્ડના સચિવ આર.આર. વ્યાસ દ્વારા કરવામાં આવેલી સત્તાવાર જાહેરાત મુજબ, ગત તા. ૨૯/૦૩/૨૦૨૬ના રોજ લેવાયેલી આ પરીક્ષાની ‘પ્રોવિઝનલ આન્સર-કી’ બોર્ડની વેબસાઇટ www.gseb.org પર પ્રસિદ્ધ કરવામાં આવી છે. આ આન્સર-કી ગુજરાતી, હિન્દી અને અંગ્રેજી એમ ત્રણેય માધ્યમોના વિષય તજજ્ઞો દ્વારા તૈયાર કરવામાં આવી છે.

વિષયવાર અને સેટ મુજબ આન્સર-કી જાહેર:
બોર્ડ દ્વારા જાહેર કરવામાં આવેલી આ આન્સર-કીમાં ગણિત (૦૫૦), ભૌતિક વિજ્ઞાન (૦૫૪), રસાયણ વિજ્ઞાન (૦૫૨) અને જીવ વિજ્ઞાન (૦૫૬) એમ ચારેય મુખ્ય વિષયોનો સમાવેશ થાય છે. પરીક્ષામાં પૂછવામાં આવેલા પ્રશ્નપત્ર સેટ (T.Q.P.) નંબર ૧ થી ૨૦ માટેના જવાબો આ પ્રોવિઝનલ કીમાં દર્શાવવામાં આવ્યા છે. જે ઉમેદવારોએ આ પરીક્ષા આપી હોય તેઓ વેબસાઈટ પર જઈને પોતાના જવાબોની ચકાસણી કરી શકે છે.

વાંધા રજૂઆત માટેની પ્રક્રિયા અને સમયમર્યાદા:
જો કોઈ ઉમેદવારને બોર્ડ દ્વારા જાહેર કરાયેલા જવાબો સામે કોઈ વાંધો કે રજૂઆત હોય, તો તેઓ નિયત નમૂનામાં પોતાની રજૂઆત મોકલી શકશે. આ માટે ઉમેદવારે વિષયવાર, માધ્યમવાર અને પ્રશ્નદીઠ અલગ-અલગ ફોર્મ ભરીને જરૂરી આધાર-પુરાવાઓ સાથે Email ID: [email protected] પર મોકલી આપવાનું રહેશે. રજૂઆત કરવાની છેલ્લી તારીખ ૦૮/૦૪/૨૦૨૬, બુધવારના રોજ સાંજે ૧૮:૦૦ કલાક સુધીની રાખવામાં આવી છે. નિર્ધારિત સમયમર્યાદા બાદ અથવા જરૂરી આધારો વગર મળેલી કોઈ પણ રજૂઆત ગ્રાહ્ય રાખવામાં આવશે નહીં.

ફી અને રિફંડની જોગવાઈ:
આન્સર-કી અંગેની રજૂઆત માટે પ્રશ્નદીઠ ૫૦૦ રૂપિયા ફી નક્કી કરવામાં આવી છે, જે ઉમેદવારે ‘SBI BANK’ માં ચલણથી ભરવાની રહેશે. ચલણનો નમૂનો પણ બોર્ડની વેબસાઈટ પર ઉપલબ્ધ કરાવવામાં આવ્યો છે. રજૂઆત સાથે ફી ભર્યાના ચલણની નકલ ઈ-મેઈલ મારફતે મોકલવી અનિવાર્ય છે, ચલણ વગરની રજૂઆતને બોર્ડ ધ્યાને લેશે નહીં. મહત્વની બાબત એ છે કે, જો ઉમેદવાર દ્વારા કરવામાં આવેલી રજૂઆત સાચી ઠરશે, તો તે પ્રશ્ન માટે ભરેલી ફી ઉમેદવારને પરત (રિફંડ) કરવામાં આવશે.