ગાંધીનગર : અમેરિકા અને ઈરાન વચ્ચે ચાલી રહેલા ભીષણ યુદ્ધના કારણે મધ્ય પૂર્વના સમુદ્રમાં તણાવ ચરમસીમાએ છે. તેહરાને વ્યૂહાત્મક રીતે મહત્વની ગણાતી હોર્મુઝ સ્ટ્રેટ (Strait of Hormuz) માંથી જહાજોના વહન પર પ્રતિબંધ મૂક્યો હોવા છતાં, ભારતની મજબૂત કૂટનીતિના કારણે ભારતીય જહાજોને વિશેષ મંજૂરી મળી રહી છે. આ કડીમાં ભારતનું વધુ એક વિશાળ LPG ટેન્કર 'ગ્રીન સાન્વી' સફળતાપૂર્વક આ જોખમી જળમાર્ગ પાર કરી ગયું છે અને હવે તે ગુજરાતના બંદર તરફ આગળ વધી રહ્યું છે. આ સફળતાને ગુજરાતના ગૃહરાજ્ય મંત્રી હર્ષ સંઘવીએ "ભારતીય કૂટનીતિની જીત" ગણાવી હતી.
હર્ષ સંઘવીની સોશિયલ મીડિયા પોસ્ટનો જવાબ આપતા મુંબઈ સ્થિત ઈરાનના વાણિજ્ય દૂતાવાસે અત્યંત ભાવુક સંદેશ પાઠવ્યો છે. દૂતાવાસે જણાવ્યું કે, "ભારત અને ખાસ કરીને ગુજરાતનો અમારા ઈતિહાસમાં અત્યંત સન્માનિત સ્થાન છે. સદીઓ પહેલા ગુજરાતે અમારી ધરતી પરથી આવેલા લોકોનું (પારસી સમુદાય) જે રીતે આદર-સત્કાર સાથે સ્વાગત કર્યું હતું, તેને અમે ક્યારેય ભૂલી શકીએ તેમ નથી." ઈરાને આ સભ્યતાના સુદ્રઢ સંબંધોને આધારે ભારત સાથેની મિત્રતા અને સહયોગને વધુ મજબૂત કરવા માટે પોતાની કટિબદ્ધતા દોહરાવી છે.
બીજી તરફ, હોર્મુઝ સ્ટ્રેટ બંધ થવાના અહેવાલો વચ્ચે દેશમાં ઈંધણની અછત ઉભી ન થાય તે માટે ભારત સરકાર સતત કાર્યરત છે. પેટ્રોલિયમ અને કુદરતી ગેસ મંત્રાલયે નાગરિકોને અપીલ કરી છે કે તેઓ પેટ્રોલ, ડીઝલ કે LPG ની ગભરાટભરી ખરીદી (Panic Buying) ટાળે. સરકારે ખાતરી આપી છે કે દેશમાં રસોઈ ગેસ અને ઈંધણનો પુરવઠો પૂરતો છે અને પરિસ્થિતિ સંપૂર્ણપણે નિયંત્રણમાં છે. આવશ્યક સેવાઓ જેવી કે હોસ્પિટલો અને ઘરો માટે પાઇપ્ડ નેચરલ ગેસ (PNG) ને પ્રાથમિકતા આપવામાં આવી રહી છે. હાલમાં રિફાઇનરીઓમાં ઉત્પાદન વધારીને પુરવઠો સુનિશ્ચિત કરવામાં આવી રહ્યો છે.