સુરત : 'હીરા નગરી' અને 'ઉદ્યોગ નગરી' તરીકે ઓળખાતા સુરતમાં સંકટ સમયે માનવતા મહેકી ઉઠી છે. હાલમાં અમેરિકા-ઈરાન યુદ્ધના કારણે રાંધણ ગેસના બાટલાની સર્જાયેલી અછતે શ્રમિક પરિવારોની હાલત કફોડી કરી દીધી છે. રસોઈ બનાવવા માટે ગેસ ન મળતા અનેક શ્રમિકોએ ભારે હૈયે સામાન બાંધીને વતન પરત જવાનો નિર્ણય લીધો હતો. આ કપરી પરિસ્થિતિમાં સુરતના ઉદ્યોગપતિ પિંકુ પાત્રએ એક એવી શોધ કરી છે, જેણે સેંકડો શ્રમિકોના ઘરના ચૂલા ફરીથી સળગતા કર્યા છે.
શ્રી ગણેશ એન્જિનિયરિંગના માલિક પિંકુ પાત્રએ જ્યારે જોયું કે તેમના કારખાનાના કામદારો ગેસના અભાવે લાચાર બની રહ્યા છે, ત્યારે તેમણે માત્ર આશ્વાસન આપવાને બદલે ઉકેલ શોધવાનું નક્કી કર્યું. એક શ્રમિકે જ્યારે રડતા રડતા પૂછ્યું કે, "સાહેબ, ગેસ વગર ઘરે બાળકોને રોટલી કેવી રીતે ખવડાવીશ?" ત્યારે પિંકુ પાત્રએ પોતાની કોઠાસૂઝનો ઉપયોગ કરી ડીઝલ અને વેસ્ટ ઓઈલથી ચાલતો એક ખાસ ચૂલો તૈયાર કર્યો. આ ચૂલો સંપૂર્ણપણે સુરક્ષિત છે અને તેમાં રાંધણ ગેસના બાટલાની જરૂર પડતી નથી.
પિંકુ પાત્રએ પોતાની ઉદારતાનું ઉદાહરણ પૂરું પાડતા, જે શ્રમિકો વતન જવાની તૈયારી કરી રહ્યા હતા તેમને આ ચૂલા મફતમાં આપ્યા છે. આ શોધની વાત વાયુવેગે ફેલાતા હવે માત્ર ગુજરાત જ નહીં, પરંતુ સમગ્ર ભારતભરમાંથી આ ડીઝલ ચૂલા માટે ઓર્ડર મળી રહ્યા છે. જે શ્રમિકો રેલવે સ્ટેશન તરફ જઈ રહ્યા હતા, તેઓ હવે ફરીથી કામ પર પરત ફર્યા છે. સુરતનો આ અનોખો 'જુગાડ' આજે દેશભરના મધ્યમ અને ગરીબ વર્ગના પરિવારો માટે આશીર્વાદરૂપ સાબિત થઈ રહ્યો છે.