અંબાજી: સુપ્રસિદ્ધ શક્તિપીઠ અંબાજી ખાતે દર્શનાર્થે આવતા માઈભક્તોની અતૂટ આસ્થાના દ્રશ્યો અવારનવાર જોવા મળતા હોય છે, પરંતુ તાજેતરમાં મધ્યપ્રદેશથી આવેલા એક વિશાળ સંઘે સૌનું ધ્યાન ખેંચ્યું છે. મધ્યપ્રદેશના વિવિધ વિસ્તારોમાંથી અંદાજે 920 જેટલી મહિલા શ્રદ્ધાળુઓ ખાસ અંબાજીના દર્શનાર્થે ઉમટી પડી હતી. આ મહિલા પદયાત્રીઓએ મંદિરમાં દર્શન કરી ધન્યતા અનુભવી હતી.
ગરબાની જમાવટ અને ભક્તિમય માહોલ
મધ્યપ્રદેશથી આવેલી આ મહિલાઓ મા અંબા પ્રત્યેની પોતાની શ્રદ્ધા વ્યક્ત કરવા માટે મંદિરમાં ગરબાની રમઝટ બોલાવી હતી. પરંપરાગત વસ્ત્રોમાં સજ્જ થઈને જ્યારે 900થી વધુ મહિલાઓએ એકસાથે ગરબા લીધા, ત્યારે સમગ્ર મંદિર પરિસર 'જય અંબે' ના નાદથી ગુંજી ઉઠ્યું હતું. ભક્તિમાં લીન આ મહિલાઓના ઉત્સાહને જોઈ અન્ય પ્રવાસીઓ પણ મંત્રમુગ્ધ બન્યા હતા.
શ્રદ્ધાની અનોખી સફર
આ વિશાળ સંઘ મધ્યપ્રદેશથી ખાસ માતાજીના આશીર્વાદ લેવા માટે અંબાજી પહોંચ્યો હતો. યાત્રા દરમિયાન મહિલાઓએ ભજન-કીર્તન સાથે માર્ગ કાપ્યો હતો. શ્રદ્ધાળુઓના મતે, મા અંબાના દર્શન માત્રથી જ બધો થાક ઉતરી જાય છે અને મન પ્રફુલ્લિત થઈ જાય છે.
યાત્રાધામમાં શ્રદ્ધાળુઓનો પ્રવાહ વધ્યો
અંબાજીમાં છેલ્લા કેટલાક સમયથી પરપ્રાંતના શ્રદ્ધાળુઓની સંખ્યામાં મોટો ઉછાળો જોવા મળી રહ્યો છે. ખાસ કરીને રાજસ્થાન અને મધ્યપ્રદેશથી હજારોની સંખ્યામાં ભક્તો પદયાત્રા કરીને અહીં પહોંચતા હોય છે. આ 920 મહિલાઓના સંઘે અંબાજીના આંગણે શ્રદ્ધા અને સંસ્કૃતિનો અનોખો સંગમ રચ્યો હતો.