ડીસા:બનાસકાંઠાના ડીસામાં સર્વોદય બેંક બહાર સર્જાયેલી એક અત્યંત કમનસીબ અને આઘાતજનક ઘટનામાં, સિક્યુરિટી ગાર્ડની બેદરકારીને કારણે એક નિર્દોષ મહિલાએ પોતાનો જીવ ગુમાવ્યો છે. ગત ૨૭ માર્ચના રોજ બનેલી આ ઘટનામાં ગંભીર રીતે ઈજાગ્રસ્ત થયેલી મહિલાનું લાંબી સારવાર બાદ આખરે અમદાવાદ સિવિલ હોસ્પિટલમાં મૃત્યુ નીપજ્યું છે.
શું હતી સમગ્ર ઘટના?
મળતી માહિતી મુજબ, ૨૭ માર્ચના રોજ ડીસાની સર્વોદય બેંક બહાર ફરજ પર તૈનાત સિક્યુરિટી ગાર્ડ પોતાની બંદૂક ખભે ચડાવવાનો પ્રયાસ કરી રહ્યો હતો. આ પ્રક્રિયા દરમિયાન ગાર્ડની બેદરકારીને લીધે બંદૂકમાંથી અચાનક ગોળી છૂટી હતી. નસીબજોગે તે સમયે બેંકની સામે જ એક રિક્ષા ઊભી હતી, જેમાં બેઠેલા રાણપુર ગામના શકરીબેન ધારજીજી ઠાકોરને આ ગોળી વાગી હતી.
સારવાર દરમિયાન તોડ્યો દમ
ગોળી વાગતા જ શકરીબેન ગંભીર રીતે લોહીલુહાણ હાલતમાં રિક્ષામાં ઢળી પડ્યા હતા. આ અચાનક બનેલી ઘટનાથી બેંક પરિસરમાં અફરાતફરી મચી ગઈ હતી. ઘાયલ મહિલાને તાત્કાલિક સ્થાનિક હોસ્પિટલ અને ત્યારબાદ વધુ સારવાર માટે અમદાવાદ સિવિલ હોસ્પિટલમાં ખસેડવામાં આવ્યા હતા. છેલ્લા કેટલાક દિવસોથી તેઓ જીવન-મરણ વચ્ચે ઝોલા ખાઈ રહ્યા હતા, પરંતુ ગંભીર ઈજાઓને કારણે આખરે તેમણે અંતિમ શ્વાસ લીધા હતા.
ગામમાં શોકનું મોજું
એક સામાન્ય કામ માટે ઘરની બહાર નીકળેલા અને બેંક પાસે પહોંચેલા નિર્દોષ મહિલાના આ રીતે કરુણ મૃત્યુના સમાચાર મળતા જ તેમના વતન રાણપુર ગામમાં શોકનું મોજું ફરી વળ્યું છે. પરિવારજનો આઘાતમાં ગરકાવ થઈ ગયા છે અને ઘટનાને લઈને લોકોમાં ભારે રોષ જોવા મળી રહ્યો છે.
પોલીસ તપાસ શરૂ
ઘટનાની જાણ થતા જ પોલીસ કાફલો તાત્કાલિક ઘટનાસ્થળે દોડી આવ્યો હતો. પોલીસે સિક્યુરિટી ગાર્ડની અટકાયત કરી તેની બંદૂક જપ્ત કરી છે. હાલ પોલીસે અકસ્માતે મોતનો ગુનો નોંધીને ગાર્ડની બેદરકારીના તમામ પાસાઓ તપાસવા માટે કાયદેસરની કાર્યવાહી હાથ ધરી છે.