અમદાવાદ:રાજ્યમાં કાળઝાળ ગરમીની વચ્ચે હવામાન વિભાગે ચિંતાજનક સમાચાર આપ્યા છે. ગુજરાતમાં ફરી એકવાર વાતાવરણ પલટાવાની શક્યતા છે, જેના કારણે આગામી 7 એપ્રિલના રોજ રાજ્યના અનેક વિસ્તારોમાં કમોસમી વરસાદ એટલે કે માવઠું પડી શકે છે. ખાસ કરીને સૌરાષ્ટ્ર અને ઉત્તર ગુજરાતના જિલ્લાઓમાં વરસાદની તીવ્ર અસર જોવા મળી શકે છે.
ખેડૂતોની ચિંતામાં વધારો
ચાલુ વર્ષે વારંવાર બદલાતા હવામાનને કારણે ખેતીને મોટું નુકસાન પહોંચ્યું છે, ત્યારે ફરી એકવાર માવઠાની આગાહીને પગલે જગતનો તાત ચિંતામાં મુકાયો છે. ખેતરમાં તૈયાર પડેલા રવિ પાક અને કેરીના પાકને આ કમોસમી વરસાદથી મોટું નુકસાન થવાની ભીતિ સેવાઈ રહી છે. હવામાન વિભાગના જણાવ્યા અનુસાર, વેસ્ટર્ન ડિસ્ટર્બન્સના કારણે વાતાવરણમાં આ ફેરફાર જોવા મળશે.
કયા વિસ્તારોમાં થશે અસર?
હવામાન વિભાગની આગાહી મુજબ, 7 એપ્રિલે ઉત્તર ગુજરાતના બનાસકાંઠા, પાટણ તેમજ સૌરાષ્ટ્રના જામનગર, રાજકોટ અને કચ્છના વિસ્તારોમાં ગાજવીજ સાથે હળવોથી મધ્યમ વરસાદ પડી શકે છે. પવનની ગતિ સામાન્ય કરતાં વધુ રહેવાની શક્યતા હોવાથી તંત્ર દ્વારા પણ સાવચેતીના પગલાં લેવા સૂચના અપાઈ છે.
આ અચાનક આવનારા ફેરફારથી ગરમીમાં આંશિક રાહત મળી શકે છે, પરંતુ ખેતી અને બાગાયતી પાકો માટે આ વરસાદ આફત બનીને ત્રાટકી શકે છે.