ખેડા જિલ્લાના મહેમદાવાદ નગરપાલિકા વિસ્તારમાં ગત મોડી રાત્રે તસ્કરોએ તરખાટ મચાવતા ચોરીની મોટી ઘટના સામે આવી છે. મહેમદાવાદના મુખ્ય બજારમાં આવેલા માર્કેટયાર્ડમાં અજાણ્યા ચોરએ એકસાથે અંદાજિત 7 થી 8 જેટલી દુકાનોને નિશાન બનાવી હતી.

પ્રાપ્ત વિગતો અનુસાર, માર્કેટયાર્ડમાં આવેલી અનાજ-કરિયાણાની દુકાનોના તાળા તોડીને ચોર ઈસમો અંદર પ્રવેશ્યા હતા અને ચોરીની ઘટનાને અંજામ આપ્યો હતો. સવારે જ્યારે વેપારીઓ પોતાની દુકાને પહોંચ્યા ત્યારે તાળા તૂટેલા જોઈને સ્તબ્ધ થઈ ગયા હતા. આ ઘટનાની જાણ વાયુવેગે સમગ્ર પંથકમાં ફેલાતા વેપારીઓમાં રોષ અને ફફડાટ જોવા મળ્યો હતો.

ઘટનાની જાણ થતા જ મહેમદાવાદ પોલીસનો કાફલો તાત્કાલિક ઘટનાસ્થળે દોડી આવ્યો હતો. પોલીસે માર્કેટયાર્ડમાં પ્રાથમિક તપાસ હાથ ધરીને પંચનામું કરવાની તજવીજ શરૂ કરી છે. આ ચોરીમાં કેટલી રોકડ રકમ કે મુદ્દામાલની ચોરી થઈ છે તેની વિગતો તપાસ બાદ જ સ્પષ્ટ થશે. હાલમાં પોલીસ આસપાસના સીસીટીવી ફૂટેજ ચકાસીને અજાણ્યા તસ્કરોને ઝડપી પાડવા માટે વધુ તપાસ કરી રહી છે.