સુરત :ગુજરાતમાં ડાંગ જિલ્લાના સ્થાનિક રાજકારણમાં હાલ ગરમાવો જોવા મળી રહ્યો છે. ખાસ કરીને આગામી સ્થાનિક સ્વરાજની ચૂંટણીઓને લઈને ભાજપના જિલ્લા પ્રભારીની ભૂમિકા સામે સંગઠનના પાયાના કાર્યકરોમાં રોષ હોવાની ચર્ચાઓ વહેતી થવા પામી છે. રાજકીય વર્તુળોમાં એવી ચર્ચા છે કે, ટિકિટ વિતરણની પ્રક્રિયામાં વર્ષોથી પાર્ટી માટે પરસેવો પાડતા નિષ્ઠાવાન અને ચૂંટણી જીતે તેવા સ્થાનિક પાયાના કાર્યકરોને હાંસિયામાં ધકેલી દેવામાં આવી રહ્યા છે.
આરોપ છે કે પ્રભારી દ્વારા સંગઠનના પાયાના સૈનિકોને બદલે અન્ય પસંદગીના વ્યક્તિઓને ટિકિટ મળે તેવા પ્રયાસો થઈ રહ્યા છે. જો પાયાના કાર્યકરોની અવગણના કરી 'પેરાશૂટ' ઉમેદવારો કે અન્યને પ્રાધાન્ય આપવામાં આવશે, તો ચૂંટણીમાં ભાજપને મોટું નુકસાન વેઠવું પડી શકે છે તેવી ભીતિ રાજકીય વિશ્લેષકો વ્યક્ત કરી રહ્યા છે. બીજી તરફ કોંગ્રેસે પણ ચૂંટણીના તૈયારીઓ કરી લીધી છે. અને તમામ બેઠકો પર ઉમેદવારો નક્કી કરી દેવાયા છે. અહીં મહત્તમ એક જ ઉમેદવાર હોવાથી શાંતિથી પ્રક્રિયા પૂર્ણતા તરફ છે.
કોંગ્રેસ દ્વારા શરૂઆતથી જ તૈયારીઓ ચૂંટણી મુદ્દે શરૂ કરી લેવામાં આવી હતી. મહિના પહેલા જ મહત્તમ કામગીરી પૂર્ણ કરી હવે ચૂંટણી જાહેર થયા બાદ ઉમેદવારોની યાદી પણ ફાઇનલ કરી છે. હવે તે અંગે મોહર મરાય એટલું જ વાર છે તેમ સ્નેહલ ઠાકરે( ડાંગ જિલ્લા કોંગ્રેસ પ્રમુખ) જણાવ્યું હતું .
સંગઠન પ્રભારીનું કામ સંગઠનને મજબૂત કરવાનું છે, તે જ કામગીરી હું કરી રહ્યો છું. પાર્ટીના હિતની જ કામગીરી હું કરી રહ્યો છું. પાર્ટીનું હિત જ સર્વપરી છે તેમ પ્રભારી, જિલ્લા ભાજપ રાજેશ દેસાઈએ જણાવ્યું હતું