અમદાવાદ :સ્થાનિક સ્વરાજ્યની ચૂંટણીઓ પહેલા ગુજરાતના વિવિધ જિલ્લાઓમાં ટિકિટ વહેંચણીને લઈ રાજકીય ભૂકંપ સર્જાયો છે. ભાજપમાં બળવો, રાજીનામા અને પક્ષપલટાના જે દ્રશ્યો સામે આવ્યા છે.

મહીસાગર જિલ્લા ભાજપમાં ટિકિટ વહેંચણી બાદ મોટું ગાબડું પડ્યું છે. જિલ્લા ભાજપ બક્ષીપંચ મોરચાના ઉપપ્રમુખ રણજિતસિંહ બારીયાએ પક્ષના તમામ હોદ્દા પરથી રાજીનામું આપી દીધું છે. વર્ષોથી સક્રિય અને ભૂતકાળમાં સરપંચ રહી ચુકેલા રણજિતસિંહે આરોપ લગાવ્યો છે કે પક્ષમાં કાર્યકરોની સતત અવગણના થઈ રહી છે અને મૂળ સિદ્ધાંતો નેવે મુકાયા છે. સોશિયલ મીડિયા પર રાજીનામું મૂકી તેમણે વિરોધ નોંધાવ્યો છે.

નર્મદા જિલ્લામાં  પૂર્વ મંત્રી દર્શનાબેન દેશમુખના રાજકીય સલાહકાર  સુરેશ વસાવાએ રાજીનામું આપીને સનસનાટી મચાવી છે. નાંદોદ તાલુકાની પોઇચા બેઠક પર આદિવાસી સમાજની જગ્યાએ અન્ય સમાજની વ્યક્તિને ટિકિટ અપાતા તેઓ નારાજ થયા છે. તેમણે આક્ષેપ કર્યો છે કે આદિવાસી સમાજની દીકરી કે જેણે અન્ય સમાજમાં લગ્ન કર્યા છે તેને ટિકિટ આપી સમાજને અન્યાય કરવામાં આવ્યો છે.

જામનગરમાં ભારે રસપ્રદ કિસ્સો સામે આવ્યો છે. પૂર્વ દંડક જડીબેન ટિકિટ ન મળતા નારાજ થઈને બહુજન સમાજવાદી પાર્ટીમાં જોડાયા હતા. જોકે, આ પક્ષપલટો માત્ર 3 કલાક જ ટક્યો હતો. ભાજપના નેતાઓના મનામણાં બાદ જડીબેને ફરી કેસરીયો ધારણ કર્યો અને મંત્રી રિવાબા જાડેજા સાથે ફોટો શેર કરીને વિવાદનો અંત આણી 'ઘરવાપસી' કરી હતી.

પોરબંદરમાં વર્ષ 2012થી ભાજપ સાથે જોડાયેલા મજબૂત આગેવાન અરભમ કારાવદરાએ પક્ષને રામ-રામ કહી દીધા છે. વોર્ડ નંબર 3 માં ટિકિટ ન મળતા તેઓ નારાજ થયા છે. હવે તેઓ પોતાની આખી પેનલ સાથે આમ આદમી પાર્ટીમાં (AAP) જોડાઈને ભાજપ સામે જ જંગે ચડશે, જેનાથી પોરબંદરમાં નવા સમીકરણો સર્જાયા છે.