ખેડા તા.૧૧ :  ગુજરાતમાં કડક દારૂબંધી હોવા છતાં બુટલેગરો દ્વારા દારૂ ઘુસાડવાના પ્રયાસો યથાવત છે. ખેડા જિલ્લાના કપડવંજમાં સ્ટેટ મોનિટરિંગ સેલ (SMC) ગાંધીનગરે મોટી સફળતા મેળવી છે. કપડવંજ-મોડાસા હાઇવે પર આવેલી એક હોટેલના પાર્કિંગમાંથી રૂ. 54 લાખની કિંમતનો વિદેશી દારૂ ભરેલું કન્ટેનર ઝડપી પાડવામાં આવ્યું છે. આ કેસમાં કન્ટેનર ચાલક અને હોટેલ મેનેજર સહિત 2 શખ્સોની અટકાયત કરવામાં આવી છે.

 

 

બાતમીના આધારે દરોડો

 

 

SMC ગાંધીનગરને ચોક્કસ બાતમી મળી હતી કે રાજસ્થાનથી આવેલું દારૂ ભરેલું કન્ટેનર કપડવંજની હોટેલના પાર્કિંગમાં ઉભું છે અને રાતના સમયે નાના વાહનોમાં દારૂનો જથ્થો ખાલી કરી અમદાવાદ, નડિયાદ અને વડોદરા તરફ સપ્લાય કરવામાં આવનાર છે. બાતમીના આધારે SMCની ટીમે શુક્રવારે રાત્રે 11:30 વાગ્યાની આસપાસ હોટેલ પર દરોડો પાડ્યો હતો વિદેશી દારૂની અલગ-અલગ બ્રાન્ડની કુલ 8,640 બોટલ મળી. 

કિંમત પકડાયેલા દારૂની બજાર કિંમત રૂ. 54,27,000 આંકવામાં આવી છે.કુલ મુદ્દામાલ કન્ટેનર, મોબાઈલ ફોન અને અન્ય વસ્તુ મળીને કુલ રૂ. 74.50 લાખનો મુદ્દામાલ કબજે કરાયો.

1.કન્ટેનર ચાલક મુકેશ કુમાર, રહે. બાડમેર, રાજસ્થાન 

2.હોટેલ મેનેજર રાકેશ પટેલ, રહે. કપડવંજ 

 

પ્રાથમિક પૂછપરછમાં સામે આવ્યું છે કે આ દારૂનો જથ્થો રાજસ્થાનના બાડમેરથી ભરવામાં આવ્યો હતો. કપડવંજની હોટેલને ‘સેફ હાઉસ’ તરીકે વાપરવામાં આવતી હતી. અહીંથી નાના ટેમ્પો અને કારમાં દારૂ ભરીને ગુજરાતના જુદા જુદા શહેરોમાં પહોંચાડવાનું નેટવર્ક ચાલતું હતું.

 

 

સ્થાનિક પોલીસ અજાણ

 

 

નોંધનીય બાબત એ છે કે આ સમગ્ર કાર્યવાહી SMC ગાંધીનગર દ્વારા કરવામાં આવી હતી. સ્થાનિક કપડવંજ ટાઉન પોલીસને આ ઓપરેશનની જાણ પણ કરવામાં આવી ન હતી. SMC દ્વારા છેલ્લા 30 દિવસમાં ખેડા જિલ્લામાં આ ત્રીજો મોટો દરોડો છે.

SMCએ બંને આરોપીઓ વિરુદ્ધ પ્રોહિબિશન એક્ટ હેઠળ ગુનો નોંધી વધુ તપાસ શરૂ કરી છે. દારૂનો જથ્થો કોણે મોકલ્યો અને ગુજરાતમાં કોને ડિલિવરી થવાની હતી તે દિશામાં તપાસનો ધમધમાટ શરૂ કરાયો છે. મુખ્ય સૂત્રધારને પકડવા માટે ટીમો રવાના કરી દેવાઈ છે.

 

ગુજરાતમાં ચૂંટણીનો માહોલ છે ત્યારે દારૂની ડિમાન્ડ વધી જતી હોવાથી બુટલેગરો સક્રિય થયા છે, પરંતુ SMCની સતત વોચના કારણે મોટા જથ્થાઓ ઝડપાઈ રહ્યા છે.