અમદાવાદ: સ્થાનિક સ્વરાજ્યની ચૂંટણીના રણમેદાનમાં ભારતીય જનતા પાર્ટીએ અમદાવાદ મહાનગરપાલિકા (AMC) માટે પોતાના 192 યોદ્ધાઓની યાદી જાહેર કરીને રાજકારણમાં ગરમાવો લાવી દીધો છે. ઉમેદવારી ફોર્મ ભરવાના છેલ્લા કલાકોમાં આવેલી આ યાદીમાં ભાજપે ‘નો રિપીટ થિયરી’નો કડક અમલ કરીને અનેક દિગ્ગજોના પત્તા કાપી નાખ્યા છે. ગત ટર્મના 160 કોર્પોરેટરોમાંથી માત્ર 36 નસીબદાર ચહેરાઓને જ ફરી મેદાનમાં ઉતારવામાં આવ્યા છે, જ્યારે 120 થી વધુ નિષ્ક્રિય નેતાઓને ઘરે બેસાડી દેવાયા છે.
ખુમારીની કદર: પ્લેન ક્રેશના હીરોને મળ્યું સન્માન
ભાજપે આ વખતે માત્ર રાજકારણ નહીં, પણ સમાજ સેવાને પ્રાધાન્ય આપ્યું છે. અસારવા વોર્ડમાંથી ગિરીશ વણઝારાને ટિકિટ અપાઈ છે, જેમણે સિવિલ હોસ્પિટલમાં દર્દીઓની નિઃસ્વાર્થ સેવા કરી છે. તો શાહીબાગ વોર્ડમાંથી રાજુ પટેલને ઉમેદવાર બનાવવામાં આવ્યા છે. રાજુ પટેલે પ્લેન ક્રેશની ભયાનક દુર્ઘટના સમયે પીડિતોના સોના-ચાંદીના દાગીના સાચવીને પરત કરી પ્રામાણિકતાનું શ્રેષ્ઠ ઉદાહરણ પૂરું પાડ્યું હતું. આવા નિષ્ઠાવાન ચહેરાઓને તક આપી ભાજપે મતદારોને મોટો સંકેત આપ્યો છે.
મહિલા શક્તિ અને યુવા જોશનો સંગમ
અમદાવાદની 192 બેઠકોમાંથી અડધા ભાગની એટલે કે 90 જેટલી બેઠકો પર મહિલાઓને સ્થાન આપી ભાજપે મહિલા સશક્તિકરણનો નારો બુલંદ કર્યો છે. સાબરમતીથી ખુશી પરમાર અને નવા વાડજથી નિધિ વાઘેલા જેવા યુવા ચહેરાઓ ભાજપના નવા આકર્ષણ બન્યા છે. બીજી તરફ, સિનિયર નેતા દેવાંગ દાણી પર પાર્ટીએ સતત ત્રીજીવાર વિશ્વાસ મૂક્યો છે, તો AMTSના પૂર્વ ચેરમેન ધરમશી દેસાઈનું નામ મેયર પદની રેસમાં મોખરે ચર્ચાઈ રહ્યું છે.
ભાજપમાં વિજય ઉત્સાહ, કોંગ્રેસમાં ‘કન્ફ્યુઝન’
એક તરફ ભાજપના ઉમેદવારો ઢોલ-નગારા સાથે ફોર્મ ભરવા ઉમટી પડ્યા છે, ત્યારે બીજી તરફ કોંગ્રેસમાં હજુ પણ ટિકિટનો કકળાટ શાંત થયો નથી. અનેક વોર્ડમાં ઉમેદવારોના નામ રાતોરાત બદલાતા કોંગ્રેસી કાર્યકરોમાં રોષ જોવા મળી રહ્યો છે. ભાજપના ગઢ ગણાતા ઘાટલોડિયા, નારણપુરા અને થલતેજમાં પણ નવા ચહેરાઓને મેદાનમાં ઉતારીને પાર્ટીએ એન્ટી-ઈન્કમ્બન્સી (સત્તા વિરોધી લહેર) ને ખાળવાનો પૂરો પ્રયાસ કર્યો છે. હવે જોવાનું એ રહેશે કે અમદાવાદની જનતા આ ‘નવા’ ચહેરાઓને કેટલો આવકારે છે!