પાલનપુર: બનાસકાંઠાના રાજકારણનું એપીસેન્ટર ગણાતા પાલનપુરમાં આજે ભાજપે જે રીતે ઉમેદવારોની પસંદગી કરી છે, તેણે મોટા-મોટા ગજાના નેતાઓના શ્વાસ અધ્ધર કરી દીધા છે. સ્થાનિક સ્વરાજ્યની ચૂંટણી માટે ફોર્મ ભરવાનો આજે છેલ્લો દિવસ હોવા છતાં, ભાજપે કોઈ સત્તાવાર યાદી જાહેર કરવાને બદલે સીધા જ પસંદ કરેલા ઉમેદવારોને 'ફોન' કરીને મેદાનમાં ઉતારી દીધા છે. આ અનોખી વ્યૂહરચનાએ પાલનપુરના રાજકારણમાં ભારે સસ્પેન્સ અને ઉત્તેજના ફેલાવી દીધી છે.
દિગ્ગજોના કિલ્લા ધરાશાયી, યુવા લોહીને પ્રાધાન્ય
પાલનપુર નગરપાલિકામાં આ વખતે ભાજપે જે ‘નો રિપીટ થિયરી’ અપનાવી છે, તે અગાઉ ક્યારેય જોવા મળી નથી. પૂર્વ બોડીમાંથી માત્ર 5 જ કોર્પોરેટરોને ફરીથી મેદાનમાં ઉતારાયા છે, અને આ પાંચેય સભ્યો પણ એવા છે જેઓ અગાઉ માત્ર એક જ ટર્મ લડ્યા હતા. જેનો સ્પષ્ટ અર્થ એ છે કે, વર્ષોથી સત્તા ભોગવતા સિનિયર નેતાઓ અને પૂર્વ હોદ્દેદારોના પત્તા પક્ષે સાવ સાફ કરી દીધા છે. ભાજપ કાર્યાલય ‘પંચામૃત’ ખાતે આજે જૂના જોગીઓને બદલે ઉત્સાહી યુવા ચહેરાઓનો જમાવડો જોવા મળ્યો હતો.
ફોન રણક્યો અને નસીબ ચમક્યું!
ગઈકાલ મોડી રાતથી જ પાલનપુર ભાજપના હાઈકમાન્ડ દ્વારા ઉમેદવારોને ટેલિફોનિક જાણ કરવાની પ્રક્રિયા શરૂ કરી દેવામાં આવી હતી. જેમને ફોન પર લીલી ઝંડી મળી, તેવા ઉમેદવારોએ વહેલી સવારથી જ પોતાના ટેકેદારો સાથે કાર્યાલયે પહોંચીને મેન્ડેટ મેળવવાની દોડધામ શરૂ કરી દીધી હતી. સત્તાવાર લિસ્ટ જાહેર ન થવા પાછળનું મુખ્ય કારણ જૂના નેતાઓના સંભવિત બળવાને રોકવાનું માનવામાં આવી રહ્યું છે.
રાજકીય ગરમાવો અને નવા સમીકરણો
ફોર્મ ભરવાની અંતિમ મિનિટો સુધી ચાલેલા આ હાઈવોલ્ટેજ ડ્રામાને કારણે વિપક્ષો પણ મુંઝવણમાં મુકાયા છે. ભાજપના આ સાહસિક નિર્ણયથી સંગઠનમાં નવા પ્રાણ ફૂંકાયા હોવાનું ચર્ચાઈ રહ્યું છે, તો બીજી તરફ જેમના પત્તા કપાયા છે તેવા નેતાઓમાં અંદરખાને ભારે રોષ જોવા મળી રહ્યો છે. હવે જોવાનું એ રહેશે કે પાલનપુરની જનતા ભાજપના આ ‘નવા અને ફ્રેશ’ ઉમેદવારોને સત્તાના સિંહાસન સુધી પહોંચાડે છે કે કેમ!