અમદાવાદ:ગુજરાત પ્રદેશ ભાજપના સંગઠનને વધુ મજબૂત કરવાના હેતુથી પ્રદેશ અધ્યક્ષ જગદીશ વિશ્વકર્મા આવતીકાલે સોમવાર, ૧૩ એપ્રિલ ૨૦૨૬ના રોજ જૂનાગઢ અને ગાંધીનગર જિલ્લાના વિવિધ તાલુકાઓના પ્રવાસે જશે. આ પ્રવાસ દરમિયાન તેઓ બુથ સ્તરના કાર્યકર્તાઓ સાથે સીધો સંવાદ કરશે અને આગામી રાજકીય વ્યૂહરચના અંગે ચર્ચા કરશે.

સવારના કાર્યક્રમો: કેશોદ અને મેંદરડામાં બુથ સંવાદ:
પ્રદેશ અધ્યક્ષના પ્રવાસનો પ્રારંભ સવારે ૯.૩૦ કલાકે કેશોદ તાલુકાના અગતરાય ખાતેથી થશે. અગતરાયના છત્રાળા પટેલ સમાજ ખાતે આયોજિત 'બુથ કાર્યકર્તા સંવાદ' કાર્યક્રમમાં તેઓ ઉપસ્થિત રહેશે. ત્યારબાદ સવારે ૧૧.૦૦ કલાકે મેંદરડા તાલુકાના સમઢીયાળા ખાતે પટેલ સમાજમાં યોજાનાર કાર્યકર્તા સંવાદમાં હાજરી આપી સંગઠનાત્મક કામગીરીની સમીક્ષા કરશે.

બપોરના કાર્યક્રમો - આસ્થા અને ઉદ્ઘાટન:
બપોરે ૨.૩૦ કલાકે જગદીશ વિશ્વકર્મા જૂનાગઢ તાલુકાના બલિયાવડ સ્થિત આઈ શ્રી દેવલ માં આશ્રમની મુલાકાત લેશે, જ્યાં તેઓ દર્શન અને પૂજન કરી આશીર્વાદ પ્રાપ્ત કરશે. ત્યારબાદ બપોરે ૩.૦૦ કલાકે ભેંસાણ ખાતે સેવા સહકારી મંડળીના ગોડાઉન ખાતે ભાજપના મધ્યસ્થ કાર્યાલયનું ઉદ્ઘાટન કરશે અને ભેંસાણ તાલુકાના બુથ કાર્યકર્તા સંમેલનને સંબોધિત કરશે.

રાત્રિનો કાર્યક્રમ - ગાંધીનગરમાં સંમેલન
દિવસભરના જૂનાગઢ જિલ્લાના પ્રવાસ બાદ, રાત્રે ૮.૩૦ કલાકે પ્રદેશ અધ્યક્ષ ગાંધીનગર જિલ્લાના મોટી આદરજ ગામે પહોંચશે. અહીં આયોજિત ભવ્ય કાર્યકર્તા સંમેલનમાં તેઓ ઉપસ્થિત રહી કાર્યકર્તાઓનો ઉત્સાહ વધારશે.
ભાજપના પ્રદેશ મીડિયા ઇન્ચાર્જ પ્રશાંત વાળાએ આ કાર્યક્રમોની સત્તાવાર વિગતો જાહેર કરી છે. સંગઠનના આ મહત્વપૂર્ણ કાર્યક્રમોમાં સ્થાનિક ધારાસભ્યો, હોદ્દેદારો અને મોટી સંખ્યામાં પાયાના કાર્યકર્તાઓ જોડાશે તેવી શક્યતા છે.