ગાંધીનગર :મુખ્યમંત્રી ભુપેન્દ્રભાઈ પટેલે પાંચમી જૂન, વિશ્વ પર્યાવરણ દિવસથી “એક પેડ માં કે નામ 3.0” વૃક્ષારોપણ અભિયાનની રાજ્યવ્યાપી શરૂઆત ગાંધીનગરથી કરાવી હતી.
  વડાપ્રધાન નરેન્દ્રભાઈ મોદીએ ધરતી માતાને હરિયાળી કરવાના પર્યાવરણ પ્રિય અભિગમથી 2024થી આ એક પેડ માં કે નામ અભિયાન શરુ કરાવ્યુ છે
વડાપ્રધાનના સફળ સુશાસનના 12 વર્ષ પૂર્ણ થવાની ઉજવણી કાર્યક્રમ અંતર્ગત આ વર્ષના વિશ્વ પર્યાવરણ દિવસથી “એક પેડ માં કે નામ 3.0”નો પ્રારંભ મુખ્યમંત્રીએ કરાવ્યો હતો.
મુખ્યમંત્રીએ ગાંધીનગરના 'જ' રોડ પર આવેલા લોકભવન સ્ટાફ ક્વાટર્સની બાજુમાં આશરે 0.5 હેક્ટર વિસ્તારમાં કુલ 5000 જેટલા રોપાઓનું વાવેતર “એક પેડ માં કે નામ 3.0” અન્વયે કરવાની શરૂઆત રાજ્યકક્ષાના વન અને પર્યાવરણ મંત્રી પ્રવીણભાઈ માળીની વિશેષ ઉપસ્થિતિમાં કરાવી હતી.  
મુખ્યમંત્રીએ આ પ્રસંગે નાગરિકોને અનુરોધ કર્યો કે, પર્યાવરણ દિવસ માત્ર ઉજવણી નહિ, પરંતુ લોકોની રોજીંદી જીવનશૈલીનો ભાગ બને તે જરૂરી છે. વડાપ્રધાનએ આપેલા મિશન લાઈફ (લાઈફ સ્ટાઈલ ફોર એનવાયરમેન્ટ)ને અપનાવી રોજબરોજના વપરાશમાં પાણી અને પેટ્રોલ જેવા પરંપરાગત ઇઁધણનો બચાવ કરવા અને વધુને વધુ વૃક્ષારોપણ કરવાની પણ તેમણે અપીલ કરી હતી. 
મુખ્યમંત્રી ભૂપેન્દ્રભાઈ પટેલે સસ્ટેનેબલ ડેવલપમેન્ટ માટે બેક ટુ બેઝિકના ધ્યેય સાથે પર્યાવરણ પ્રિય વાતાવરણનું નિર્માણ સૌ સાથે મળીને કરે તેવો અનુરોધ પણ રાજ્યના નાગરિકોને કર્યો હતો.
 રાજ્ય સરકારના વન વિભાગ દ્વારા ૨૦૨૬-૨૭ દરમિયાન એક પેડ માં કે નામ 3.0 અને વન મહોત્સવ અન્વયે સમગ્ર રાજ્યમાં કુલ 74453.90 હેકટર વિસ્તારમાં 551.91 લાખ રોપાઓનું વાવેતર કરવાનું આયોજન છે. આગામી ચોમાસામાં પ્રજાજનોને સરળતાથી રોપા મળી રહે તે માટે 423 નર્સરીમાંથી કુલ 11.80  કરોડ રોપાઓનું વિતરણ કરવાનું પણ આયોજન કરવામાં આવ્યું છે.
ગયા વર્ષ કરતા વનકવચ લક્ષ્યાંકમાં વધારો કરીને ચાલુ વર્ષે 440 હેકટર વિસ્તારમાં અંદાજિત 300 સ્થળોએ વનકવચ નિર્માણ કરવાનું  તેમજ ગ્રીન વોલ ઓફ અરવલ્લી પ્રોજેકટ હેઠળ કુલ 6652 હેકટર વિસ્તારમાં વાવેતર કરવાનું તેમજ 20100 હેકટર વિસ્તારમાં મેન્ગ્રુવ વાવેતરનું આયોજન વન વિભાગ દ્વારા હાથ ધરવામાં આવ્યું છે.
આ “એક પેડ માં કે નામ 3.0” અભિયાન પ્રારંભ અવસરે ગાંધીનગર શહેરના મેયર શ્રીમતી મીરાબેન પટેલ, રાજ્યસભા સાંસદ મયંક નાયક, ગાંધીનગર શહેર ભાજપા પ્રમુખ ડૉ,આશિષ દવે, વન અને પર્યાવરણ વિભાગના અગ્ર સચિવ ડૉ. વિનોદ રાવ, અગ્ર મુખ્ય વન સંરક્ષક અને હેડ ઓફ ધી ફોરેસ્ટ ફોર્સ ડો. જયપાલસિંઘ, ગાંધીનગર જિલ્લા કલેક્ટર રવિન્દ્ર ખટાલે તથા અન્ય વરિષ્ઠ વન અધિકારીઓ ઉપસ્થિત રહ્યાં હતા.