સુરત જિલ્લાના માંગરોળ તાલુકામાં ખુલ્લેઆમ દાદાગીરી અને મારામારીનો વીડિયો સોશિયલ મીડિયામાં વાયરલ થતા પોલીસ દોડતી થઈ છે. માંગરોળના મુખ્ય માર્ગ પર ચાર જેટલા શખ્સોએ એક યુવકને બાઈક પરથી ઉતારી લાકડી અને પાઈપ વડે ઢોર માર માર્યો હતો. આ સમગ્ર ઘટના નજીકમાં લાગેલા CCTV કેમેરામાં કેદ થઈ ગઈ હતી.

વાયરલ થયેલા વીડિયોમાં સ્પષ્ટપણે જોઈ શકાય છે કે એક યુવક બાઈક પર જઈ રહ્યો હતો ત્યારે અચાનક ચાર શખ્સો ત્યાં ધસી આવે છે અને યુવકને રોકી લે છે. ત્યારબાદ તમામ શખ્સો યુવક પર લાકડી અને પાઈપ વડે તૂટી પડે છે અને બેરહેમીથી માર મારે છે. આ દરમિયાન આસપાસથી પસાર થતા લોકો અને વાહનચાલકો માત્ર તમાશો જોતા જોવા મળે છે. યુવકને ગંભીર રીતે માર માર્યા બાદ તમામ હુમલાખોરો ત્યાંથી ફરાર થઈ જાય છે.

પ્રાથમિક તપાસમાં સામે આવ્યું છે કે આ હુમલો જૂની અદાવતમાં કરવામાં આવ્યો હતો. ઇજાગ્રસ્ત યુવકને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો છે, જ્યાં તેની હાલત સ્થિર હોવાનું જાણવા મળે છે.

વીડિયો વાયરલ થતા જ માંગરોળ પોલીસ હરકતમાં આવી હતી. પોલીસે વાયરલ વીડિયોના આધારે તપાસ શરૂ કરી છે અને CCTV ફૂટેજના આધારે હુમલાખોરોની ઓળખ કરવાની કામગીરી હાથ ધરી છે. પોલીસે આ મામલે ગુનો નોંધી આરોપીઓને ઝડપી લેવા માટે અલગ અલગ ટીમો બનાવી છે.

માંગરોળ પોલીસે જણાવ્યું કે દિવસે દિવસે ખુલ્લેઆમ આવી દાદાગીરી કરનારા શખ્સોને કોઈપણ ભોગે છોડવામાં નહીં આવે. આરોપીઓની ધરપકડ કરી કાયદેસરની કાર્યવાહી કરવામાં આવશે.