સુરત : સુરતના વરાછા વિસ્તારમાં ગત 27 એપ્રિલે SBI બેંકમાં થયેલી 50 લાખ રૂપિયાની સનસનીખેજ લૂંટના કેસમાં સુરત પોલીસે એક મોટું અને ચોંકાવનારું ઓપરેશન પાર પાડ્યું છે. આ કોઈ સામાન્ય લૂંટ નહોતી, પરંતુ તેની પાછળનું મગજ હજારો કિલોમીટર દૂર બિહારની જેલમાં બેઠું હતું. આ કેસનો મુખ્ય સૂત્રધાર કુંદન ભગત, જે પોતે પટનાની બેઉર જેલમાં NIA ના ગંભીર ગુનાઓ હેઠળ બંધ છે, તેલ જેલમાંથી જ આ લૂંટનું 'કમાન્ડ સેન્ટર' ચલાવી રહ્યો હતો.
જેલના સળિયા પણ લૂંટારૂને ન રોકી શક્યા
વરાછા બેંક લૂંટના કેસમાં અત્યાર સુધી પોલીસે શુભમ ઠાકુર, વિક્રમજીતસિંહ રાજપૂત અને મિથેશકુમાર રાય જેવા સાગરીતોને ઝડપી લીધા હતા. પરંતુ પૂછપરછ દરમિયાન જે માહિતી સામે આવી તેણે પોલીસને પણ ચોંકાવી દીધી. આ તમામ ઘટનાનો માસ્ટરમાઇન્ડ કુંદન ભગત છે, જે પટનાની આદર્શ સેન્ટ્રલ જેલ (બેઉર) માં બંધ હોવા છતાં આખું નેટવર્ક સંભાળતો હતો. કુંદન ભગતની ગુનાહિત કુંડળી પર નજર કરીએ તો તેની સામે UAPA, આર્મ્સ એક્ટ અને NDPS જેવા ગંભીર કાયદાઓ હેઠળ કેસ નોંધાયેલા છે.
સુરત પોલીસનું 'મિશન બિહાર'
આ કેસની ગંભીરતાને જોતા સુરત પોલીસના DCP આલોક કુમાર અને તેમની ટીમ માટે કુંદન ભગતનો કબજો મેળવવો એ સૌથી મોટો પડકાર હતો. પહેલા બિહાર પોલીસે વીડિયો કોન્ફરન્સ દ્વારા તપાસનો વિકલ્પ આપ્યો હતો, પરંતુ તેમાંથી ખાસ કોઈ સંતોષકારક પરિણામ ન મળતા સુરત પોલીસે કઠોર વલણ અપનાવ્યું. સુરતથી એક PI ની ટીમ ખાસ બિહાર રવાના કરવામાં આવી અને ત્યાંની અદાલતી પ્રક્રિયા પૂર્ણ કરીને આ ગેંગસ્ટરને સુરત ખેંચી લાવવામાં પોલીસ સફળ રહી છે.
આગામી તપાસનો રોડમેપ
સુરત લાવવામાં આવેલા કુંદન ભગતની હવે ક્રોસ ઇન્ટ્રોગેશન દ્વારા સઘન પૂછપરછ શરૂ કરવામાં આવશે. સુરત પોલીસ હવે એ દિશામાં તપાસ કરી રહી છે કે, આ લૂંટમાં અન્ય કયા મોટા માથાઓ સામેલ છે અને કુંદન ભગતે જેલની અંદરથી આટલી મોટી ઘટનાને અંજામ આપવા માટે કયા સાધનોનો ઉપયોગ કર્યો હતો. આજે આરોપીને સુરતની કોર્ટમાં રજૂ કરીને પોલીસ તેની રિમાન્ડ મેળવશે, જેથી લૂંટાયેલી રકમ અને ગેંગના અન્ય છુપાયેલા ચહેરાઓનો પર્દાફાશ કરી શકાય.