સુરત : સુરતના કતારગામ વિસ્તારમાં આવેલ નાસીરનગરમાં બનેલી એક ઘટનાએ સમગ્ર રાજ્યમાં ચકચાર જગાવી દીધી છે. જે રીતે ભરબપોરે પોલીસ અને મહાનગરપાલિકાના અધિકારીઓની હાજરીમાં ડિમોલિશનની કામગીરી કરવામાં આવી, તે જોતા એવું લાગે છે કે સુરતમાં હવે ડિમોલિશન પણ 'નકલી' કે 'રહસ્યમય' રીતે થઈ રહ્યું છે. આશરે 100 મકાનો તોડી પાડવામાં આવ્યા, છતાં જવાબદાર તંત્ર કશું જ જાણતું નથી તેવો દાવો કરીને લોકોની મજાક ઉડાવવામાં આવી રહી છે.
જવાબદારોના મોઢા પર મૌનનું તાળું
ઘટનાના વીડિયો સોશિયલ મીડિયા પર વાયરલ થયા છે, જેમાં સ્પષ્ટપણે જોઈ શકાય છે કે પોલીસના ઉચ્ચ અધિકારીઓ અને મનપાના કર્મચારીઓની હાજરી છે. તેમ છતાં, જ્યારે જવાબદારોને પૂછવામાં આવ્યું કે આ મકાનો કોણે તોડ્યા, ત્યારે તંત્રના જવાબ સાંભળીને સૌ કોઈ ચોંકી ગયા હતા. સ્થાનિક ધારાસભ્ય મોરડિયાનું કહેવું છે કે, "આ મકાનો કોણે તોડ્યા તેની મને જાણ નથી." આ નિવેદન બાદ સુરતવાસીઓમાં સવાલો ઉઠી રહ્યા છે કે શું સુરતમાં કાયદો અને વ્યવસ્થા કરતાં 'અદ્રશ્ય શક્તિઓ' વધુ તાકાતવર બની ગઈ છે?
100 પરિવારો બેઘર, ન્યાય કોણ આપશે?
આ નકલી અને શંકાસ્પદ ડિમોલિશનને કારણે 100 પરિવારો આજે રસ્તા પર આવી ગયા છે. ડિમોલિશન વખતે તંત્રની હાજરી હોવા છતાં અત્યાર સુધી કોઈ જવાબદારી નક્કી કરવામાં આવી નથી. નાસીરનગરના અસરગ્રસ્તો હવે સરકાર અને મનપાના પાપે રઝળી રહ્યા છે. અધિકારીઓની મિલીભગત અને રાજકારણીઓની અજ્ઞાનતાએ આખી ઘટનાને એક 'રહસ્યમયી મર્ડર મિસ્ટ્રી' જેવી બનાવી દીધી છે, જ્યાં ગુનેગાર આખા શહેરમાં ખુલ્લેઆમ ફરે છે, પરંતુ કોઈને તેના વિશે ખબર નથી.
પ્રશ્નોના ઘેરામાં વહીવટી તંત્ર
સુરત મહાનગરપાલિકાના દાવાઓ અને તંત્રની કામગીરી પર આ ઘટનાએ મોટો ડાઘ પાડ્યો છે. જો મનપાએ ડિમોલિશન ન કર્યું હોય, તો પછી તે સ્થળ પર તેમના અધિકારીઓ કેમ હતા? અને જો પોલીસ ત્યાં હાજર હોય, તો કોણે આ ગેરકાયદેસર કામગીરી કરવાની મંજૂરી આપી? આ ઘટના સુરતના વહીવટી તંત્રની ગંભીર બેદરકારી અને ભ્રષ્ટાચારની ગંધ આપે છે. જ્યારે આખું તંત્ર જ આ બાબતે 'અજાણ' હોવાનો ડોળ કરી રહ્યું હોય, ત્યારે સામાન્ય માણસ ન્યાયની અપેક્ષા કોની પાસે રાખે?