રાજકોટ:  ગુજરાત રાજ્યના પોલીસ વડા ડીજીપી જી. એસ. મલિકે ગૃહ વિભાગના રાજ્ય જનસંપર્ક કેન્દ્ર તેમજ પોલીસ ભવન ખાતે કાર્યરત જનસંપર્ક કાર્યાલયની ઓચિંતી મુલાકાત લીધી હતી. આ મુલાકાત દરમિયાન તેમણે કેન્દ્રની વિવિધ કામગીરીની ઝીણવટભરી સમીક્ષા કરી હતી અને પોતાની રજૂઆતો લઈને રૂબરૂ આવેલા અલગ-અલગ જિલ્લાના અરજદારો સાથે સીધો અને પ્રત્યક્ષ સંવાદ સાધ્યો હતો.

 ગાંધીનગર આવતા અરજદારોની સમસ્યાઓનું ઊંડાણપૂર્વક વિશ્લેષણ કરાયું:

મુલાકાત દરમિયાન જી. એસ. મલિકે જણાવ્યું હતું કે, ગાંધીનગર ખાતેના આ કેન્દ્રમાં નાગરિકો કેવા પ્રકારના પ્રશ્નો અને ફરિયાદો લઈને આવે છે, તેમની મુખ્ય તકલીફો તથા સમસ્યાઓ શું છે અને કયા ચોક્કસ જિલ્લાઓમાંથી અરજદારોની સંખ્યા સૌથી વધુ રહે છે, તેનું ઊંડાણપૂર્વક અને વિગતવાર વિશ્લેષણ કરવામાં આવ્યું છે. આ સમીક્ષા પાછળનો મુખ્ય હેતુ એ છે કે, જે જિલ્લાઓમાંથી વધુ નાગરિકોને પોતાની ન્યાયિક લડત માટે ગાંધીનગર સુધી ધક્કા ખાવા પડે છે, તેવા વિસ્તારોની ઓળખ કરી ત્યાં સ્થાનિક સ્તરે જ લોકોને ત્વરિત ન્યાય મળી રહે તેવી મજબૂત વ્યવસ્થા ઊભી કરી શકાય.

 જિલ્લા કક્ષાએ જ પ્રશ્નો ઉકેલાય તેવી સુદ્રઢ વ્યવસ્થા ઊભી કરાશે:

તેમણે વધુમાં ઉમેર્યું હતું કે, સામાન્ય અને મધ્યમવર્ગીય નાગરિકોને પોતાના નાના-મોટા પ્રશ્નોના કાયદાકીય નિવારણ માટે છેક ગાંધીનગર સુધી આવવું ન પડે અને તેમના જ સ્થાનિક (જિલ્લા) સ્તરે તેમની તમામ ફરિયાદોનો યોગ્ય અને સંતોષકારક નિકાલ થાય તે માટે ગૃહ વિભાગ દ્વારા આગામી સમયમાં વધુ સક્ષમ અને લોકોપયોગી વ્યવસ્થા ગોઠવવામાં આવી રહી છે. હાલના તબક્કે ગાંધીનગર ખાતે નાગરિકો દ્વારા જે પણ મહત્વની રજૂઆતો સબમિટ કરવામાં આવે છે, તેને તાત્કાલિક અસરથી સંબંધિત જિલ્લા અથવા જે-તે પોલીસ યુનિટમાં ઓનલાઈન મોકલી આપીને અરજદારોને ઝડપી, પારદર્શી અને ન્યાયિક નિકાલ મળે તેવી સુદ્રઢ વ્યવસ્થા પોલીસ પ્રશાસન દ્વારા સુનિશ્ચિત કરવામાં આવી છે.

 પોલીસ અને જનતા વચ્ચે વિશ્વાસનો મજબૂત સેતુ બનશે જનસંપર્ક કાર્યાલય:

રાજ્યના પોલીસ વડાએ સ્પષ્ટ કર્યું હતું કે, જનસંપર્ક કાર્યાલય એ માત્ર નાગરિકોની અરજીઓ સ્વીકારવાનું કોઈ સામાન્ય કેન્દ્ર નથી, પરંતુ તે પોલીસ પ્રશાસન અને સામાન્ય જનતા વચ્ચે પરસ્પર વિશ્વાસ વધારવાનો એક ખૂબ જ મજબૂત સેતુ છે. આ નાગરિક કેન્દ્રિત પ્રજાભિમુખ અભિગમ આગામી દિવસોમાં દરેક જિલ્લા સ્તરે પણ એટલો જ વ્યાપક અને મજબૂત બનાવવામાં આવશે, જેથી સમગ્ર પોલીસ તંત્ર સામાન્ય લોકો માટે વધુ લોકભોગ્ય, લોકોપયોગી, મદદરૂપ અને જવાબદાર બની રહે.