અમદાવાદના જેતલપુર વિસ્તારમાં આવેલા ઐતિહાસિક 'દેવ સરોવર' તળાવનું નસીબ હવે પલટાવા જઈ રહ્યું છે. અમદાવાદ શહેરી વિકાસ સત્તામંડળ (AUDA) દ્વારા આ તળાવના બ્યુટીફિકેશન માટે રૂ. 8.50 કરોડના માતબર ખર્ચે પ્રોજેક્ટ હાથ ધરવામાં આવ્યો છે. આધુનિક સુવિધાઓ અને હરિયાળીથી સજ્જ આ તળાવ આગામી દિવસોમાં શહેરના પરા વિસ્તારોમાં એક શ્રેષ્ઠ પિકનિક ડેસ્ટિનેશન બની રહેશે.

ઔડાના અધિકારીઓના જણાવ્યા અનુસાર, આ પ્રોજેક્ટનું કામ અંતિમ તબક્કામાં છે. જેતલપુર ખાતે આશરે 1,89,394 ચોરસ મીટરના વિશાળ વિસ્તારમાં ફેલાયેલા આ તળાવના વિકાસની કામગીરી જૂન-2026ના અંત સુધીમાં પૂર્ણ કરવાનું લક્ષ્યાંક રાખવામાં આવ્યું છે. કામગીરી પૂર્ણ થતાં જ આ વિસ્તારના રહેવાસીઓને કુદરતના સાનિધ્યમાં સમય પસાર કરવા માટે એક નવું પિકનિક સ્પોટ મળી રહેશે.

આ તળાવને માત્ર એક જળાશય તરીકે નહીં, પરંતુ એક આધુનિક રિક્રિએશન ઝોન તરીકે વિકસાવવામાં આવી રહ્યું છે. સ્થાનિક રહીશો અને મુલાકાતીઓ માટે આ તળાવ ખાતે વિવિધ આધુનિક સુવિધાઓ વિકસાવવામાં આવી રહી છે. મુલાકાતીઓ માટે અનેક પ્રકારની સુવિધાઓ ઉપલબ્ધ રહેશે, જેમાં-

ફિટનેસ ઝોન: સ્વાસ્થ્યપ્રદ જીવનશૈલીને પ્રોત્સાહન આપવા માટે તળાવની ફરતે આકર્ષક વોક-વે અને જોગિંગ ટ્રેકનું નિર્માણ કરવામાં આવ્યું છે.

બાળકો માટે પ્લે એરિયા: પરિવાર સાથે આવતા મુલાકાતીઓ અને બાળકો માટે આધુનિક રમત-ગમતના સાધનોથી સજ્જ ચિલ્ડ્રન પ્લે એરિયા તૈયાર કરવામાં આવ્યો છે.

 ગ્રીનરી અને પાર્કિંગ: મુલાકાતીઓના વાહનો માટે વ્યવસ્થિત પાર્કિંગ સુવિધા અને સ્વચ્છતા માટે આધુનિક ટોઇલેટ બ્લોક્સ બનાવવામાં આવ્યા છે.

આરામદાયક બેઠક વ્યવસ્થા: મુલાકાતીઓ શાંતિથી સમય પસાર કરી શકે તે માટે સરોવર પરિસરમાં બે આકર્ષક 'ગઝેબો' બનાવવામાં આવ્યા છે.

પર્યાવરણલક્ષી અભિગમ: સમગ્ર તળાવ પરિસરને 'ગ્રીન ઝોન'માં પરિવર્તિત કરવા માટે મિયાવાકી પદ્ધતિથી વૃક્ષારોપણ કરવામાં આવ્યું છે. વોક-વેની આસપાસ સુશોભિત છોડ અને કમ્પાઉન્ડ વોલ પાસે ઘટાદાર વૃક્ષો વાવીને પર્યાવરણને સુરક્ષિત કરવાનો પ્રયાસ કરાયો છે. AUDAનો આ પ્રયાસ શહેરી વિસ્તારમાં પર્યાવરણના સંવર્ધન માટે એક મહત્વનું કદમ છે.

જેતલપુરના આ ઐતિહાસિક સરોવરનો કાયાપલટ થવાથી માત્ર સ્થાનિક પ્રવાસનને વેગ મળશે એટલું જ નહીં, પરંતુ આસપાસના રહેવાસીઓના જીવનધોરણમાં પણ ગુણાત્મક સુધારો આવશે. ટૂંકમાં અમદાવાદના વિકાસના નકશામાં જેતલપુર હવે એક નવા પ્રવાસન કેન્દ્ર તરીકે ઉભરી રહ્યું છે.