વડોદરાના સાવલી વિસ્તારમાં બોર ખોદકામની કામગીરી દરમિયાન મુખ્ય પાણીની લાઇન તૂટી જતાં છેલ્લા 3 દિવસથી પાણી પુરવઠો સંપૂર્ણપણે ખોરવાઈ ગયો છે, જેને પગલે સ્થાનિક રહીશોમાં ભારે આક્રોશ જોવા મળી રહ્યો છે. વારંવાર તંત્રને રજૂઆત કરવા છતાં પણ કોઈ યોગ્ય ઉકેલ ન આવતા આજે રોષે ભરાયેલા લોકોએ એકઠા થઈને સ્થળ પર જ વિરોધ નોંધાવ્યો હતો. હોબાળાની જાણ થતાં જ સ્થાનિક કોર્પોરેટરો તાત્કાલિક ઘટના સ્થળે દોડી આવ્યા હતા. સ્થાનિક લોકોએ ઉનાળાની આ સિઝનમાં પડી રહેલી હાલાકીને ધ્યાને રાખીને યુદ્ધના ધોરણે લાઇન રિપેર કરી તાત્કાલિક પાણી પુરવઠો શરૂ કરવાની ઉગ્ર માગ કરી છે.