અમદાવાદ, તા. ૧૨: મુંબઈ અને ગોવામાં પોતાના સ્વાદ અને વૈભવનો જાદુ ચલાવ્યા બાદ, બોલિવૂડ અભિનેત્રી અને બિઝનેસ વુમન શિલ્પા શેટ્ટીનું પ્રખ્યાત હોસ્પિટાલિટી બ્રાન્ડ 'બાસ્ટિયન' હવે હેરીટેજ સિટી અમદાવાદના આંગણે આવી પહોંચ્યું છે. અમદાવાદ ઇન્ટરનેશનલ એરપોર્ટ પર લક્ઝરી ડાઇનિંગ અને અદભૂત જીવનશૈલીનો અનુભવ કરાવવા માટે એક વિશાળ અને ભવ્ય ડેસ્ટિનેશન ‘મેઇસન ટ્વેન્ટી-સેવન બાય બાસ્ટિયન’ (Maison 27 by Bastian) નું ભવ્ય અનાવરણ કરવામાં આવ્યું છે, જે સામાન્ય એરપોર્ટ રેસ્ટોરન્ટની વિભાવનાને સંપૂર્ણપણે બદલી નાખે છે.
અદાણી એરપોર્ટ્સ સાથેની ખાસ ભાગીદારીમાં તૈયાર કરાયેલું આ આઉટલેટ અધધ... ૫૨,૦૦૦ ચોરસ ફૂટના વિશાળ વિસ્તારમાં ફેલાયેલું છે. અમદાવાદ એરપોર્ટના ટર્મિનલ-૨ (આંતરરાષ્ટ્રીય ટર્મિનલ) ના અરાઇવલ (આગમન) વિભાગની બિલકુલ બહાર સ્થિત આ જગ્યા માત્ર ફ્લાઇટ પકડવા આવતા પ્રવાસીઓ માટે જ નહીં, પરંતુ અદભૂત ફૂડ કલ્ચરનો આનંદ માણવા માંગતા અમદાવાદના સ્થાનિક રસોઈપ્રેમીઓ માટે પણ આકર્ષણનું કેન્દ્ર બની ગયું છે.
ઝુમ્મર, કલાત્મક દીવાલો અને જેકુઝીનો રોયલ નજારો
પરંપરાગત રીતે એરપોર્ટ પર લોકો ઉતાવળમાં નાસ્તો કરતા હોય છે, પરંતુ 'મેઇસન ટ્વેન્ટી-સેવન' તમને નિરાંત પળો માણવા મજબૂર કરશે. આ રેસ્ટોરન્ટનું ઇન્ટિરિયર અત્યંત નાટકીય અને શાહી લુક આપે છે. આખી જગ્યામાં લાલ, નારંગી, કાળા અને પીળા રંગના સમૃદ્ધ શેડ્સનો ઉપયોગ કરવામાં આવ્યો છે. વિશાળ આકર્ષક ઝુમ્મરો, કલાત્મક દીવાલો, હૂંફાળા ખૂણાઓ અને મોહક લાઇટિંગ મુલાકાતીઓને એક ક્ષણમાં મંત્રમુગ્ધ કરી દે છે. અહીં સેંકડો લોકો એકસાથે બેસી શકે એટલી જગ્યા હોવા છતાં, તેની ડિઝાઇન એવી રીતે કરવામાં આવી છે કે તમને પર્સનલ સ્પેસ અને શાંતિનો અનુભવ થાય.
સૌથી અનોખી વાત એ છે કે અહીં એક અદભૂત વેલનેસ ઝોન (સુખાકારી ક્ષેત્ર) બનાવવામાં આવ્યો છે. લાંબી મુસાફરીના થાકને ઉતારવા માટે અહીં સ્પા-પ્રેરિત વેલનેસ રૂમ્સ અને ખાસ 'જેકુઝી-સ્ટાઇલ' કોર્નર્સ બનાવવામાં આવ્યા છે, જે ભારતના કોઈ પણ એરપોર્ટ રેસ્ટોરન્ટ માટે તદ્દન નવો અને આશ્ચર્યજનક પ્રયોગ છે.
શાકાહારી, જૈન અને વેગન ફૂડની અદભૂત શ્રેણી
અમદાવાદીઓના સ્વાદને ધ્યાનમાં રાખીને અહીં મેનુમાં ખાસ કાળજી રાખવામાં આવી છે. આ લક્ઝુરિયસ રેસ્ટોરન્ટમાં ટેસ્ટી મેક્સીકન બાઉલ્સ, શાકાહારી ટાકોઝથી લઈને અવનવી ગ્લોબલ વાનગીઓ પીરસવામાં આવશે. આ ઉપરાંત, હેલ્થ કોન્સિયસ લોકો માટે ટ્રેન્ડી 'સ્ટ્રોબેરી મેચા ડ્રિંક્સ' અને હેઝલનટ ક્રીમથી ભરપૂર મીઠાઈઓનો ખાસ ડેઝર્ટ સેક્શન ઉપલબ્ધ છે. ખાસ કરીને અમદાવાદના સ્વાદરસિયાઓ માટે અહીં પ્રીમિયમ 'જૈન ફૂડ' અને 'વેગન' (દૂધની બનાવટો વગરનું) મેનુ પણ રાખવામાં આવ્યું છે. જો તમે પણ લક્ઝરી લાઇફસ્ટાઇલ અને સ્વાદના શોખીન હોવ, તો અમદાવાદ એરપોર્ટનું આ નવું સરનામું તમારા લિસ્ટમાં ટોપ પર હોવું જોઈએ!