નવસારીઃ દક્ષિણ ગુજરાત અને ખાસ કરીને નવસારીના રમતજગત માટે આજે એક ગૌરવપૂર્ણ ક્ષણ સર્જાઈ છે. નવસારીની પ્રતિભાશાળી યુવા મહિલા ક્રિકેટર મૈત્રી મણિયારની ભારતીય અંડર-૧૯ મહિલા ક્રિકેટ ટીમમાં પસંદગી કરવામાં આવી છે. BCCI દ્વારા જાહેર કરાયેલી 'IDFC ફર્સ્ટ બેંક શ્રીલંકા વુમન્સ U-19 ટૂર ઓફ ઇન્ડિયા' માટેની ભારતીય ટીમમાં મૈત્રીને સ્થાન મળતાં સમગ્ર જિલ્લામાં ખુશીની લાગણી છવાઈ ગઈ છે.

મૈત્રીની આ સિદ્ધિ પાછળ વર્ષોની મહેનત, સંઘર્ષ અને સમર્પણ છુપાયેલું છે. માત્ર પાંચ વર્ષની ઉંમરે બેડમિન્ટનથી રમતગમતની શરૂઆત કરનારી મૈત્રીનો ઝુકાવ ધીમે ધીમે ક્રિકેટ તરફ વધ્યો. બેટ અને બોલ સાથેનો તેનો લગાવ એટલો મજબૂત બન્યો કે તેણે ક્રિકેટને જ પોતાના જીવનનું લક્ષ્ય બનાવી લીધું હતું.

મૈત્રીની પ્રતિભાને યોગ્ય દિશા અને વ્યાવસાયિક તાલીમ મળે તે માટે તેના પરિવારે પણ અનેક પડકારોનો સામનો કર્યો. દીકરીના ઉજ્જવળ ભવિષ્ય માટે પરિવારે નવસારી છોડીને વડોદરા શિફ્ટ થવાનો મહત્વપૂર્ણ નિર્ણય લીધો હતો. નવા શહેરમાં ભાડાના મકાનમાં રહીને પણ મૈત્રીની માતાએ તમામ મુશ્કેલીઓ સામે લડી દીકરીના સપનાને જીવંત રાખ્યું છે. આર્થિક અને માનસિક પડકારો વચ્ચે પણ પરિવારે ક્યારેય હિંમત હારી નહીં અને આજે એ જ સંઘર્ષ સફળતાના શિખર સુધી પહોંચ્યો છે.

ભારત અને શ્રીલંકાની અંડર-૧૯ મહિલા ટીમો વચ્ચે રમાનારી ત્રણ T-20 અને ત્રણ વન-ડે મેચોની શ્રેણીમાં મૈત્રી હવે ભારતની જર્સીમાં પોતાની પ્રતિભા બતાવશે. તેની પસંદગીને લઈને નવસારીમાં તેને પાયાની તાલીમ આપનાર બાળપણના કોચ કાંતિલાલ પટેલ પણ અત્યંત ખુશી અને ગર્વની લાગણી અનુભવી રહ્યા છે. મૈત્રીના ભારતીય ટીમમાં સિલેક્શન બાદ તેના ઘરમાં ઉત્સવ જેવો માહોલ જોવા મળી રહ્યો છે. પરિવારજનો, મિત્રો અને શુભેચ્છકો તરફથી અભિનંદનોનો વરસાદ થઈ રહ્યો છે. પોતાની આ સફળતા અંગે વાત કરતાં મૈત્રીએ જણાવ્યું કે તેની સૌથી મોટી પ્રેરણા અને રોલ મોડેલ ભારતીય મહિલા ક્રિકેટ ટીમની સ્ટાર ખેલાડી રાધા યાદવ છે. તે તેમના રમત પ્રત્યેના સમર્પણ અને સંઘર્ષથી ખૂબ પ્રભાવિત છે અને ભવિષ્યમાં દેશ માટે શ્રેષ્ઠ પ્રદર્શન કરવાનું પોતાનું લક્ષ્ય હોવાનું જણાવ્યું છે.

ચોક્કસપણે, મૈત્રી મણિયારની આ સફર માત્ર એક ખેલાડીની સફળતા નથી, પરંતુ હજારો દીકરીઓ માટે સંદેશ છે કે સપના મોટા હોય તો સંઘર્ષ પણ મોટો કરવો પડે. આજે નવસારીની આ દીકરીએ સાબિત કરી દીધું છે કે મહેનત અને આત્મવિશ્વાસ હોય તો કોઈપણ મુકામ દૂર નથી. હવે સૌની નજર શ્રીલંકા સામેની શ્રેણી પર છે, જ્યાં મૈત્રી પોતાના પ્રદર્શનથી દેશ, ગુજરાત અને નવસારીનું નામ વધુ રોશન કરે તેવી અપેક્ષા વ્યક્ત કરવામાં આવી રહી છે.