રાજકોટ:ગુજરાત સહિત દેશભરમાં હાલ હવામાન બે મિજાજ બદલી રહ્યું છે. રાજ્યના કેટલાક વિસ્તારોમાં અસહ્ય બફારો અને કાળઝાળ ગરમી પડી રહી છે, તો બીજી તરફ ચોમાસાના આગમનની ઘડીઓ ગણાઈ રહી છે. છેલ્લા ૨૪ કલાકમાં રાજ્યમાં ૪૧.૯ ડિગ્રી સેલ્સિયસ તાપમાન સાથે ભાવનગર સૌથી ગરમ શહેર નોંધાયું છે. ગરમીના આ પ્રકોપ વચ્ચે જનતા માટે રાહતના સમાચાર એ છે કે પ્રગતિશીલ ચોમાસું હવે છત્તીસગઢની સરહદ સુધી પહોંચી ગયું છે, જેના પગલે આજે દક્ષિણ ગુજરાતના વિવિધ વિસ્તારોમાં હળવાથી મધ્યમ વરસાદ પડવાની પ્રબળ સંભાવના હવામાન વિભાગ દ્વારા વ્યક્ત કરવામાં આવી છે.

હવામાન વિભાગની આગાહી અનુસાર, ચોમાસું સાનુકૂળ દિશામાં આગળ વધી રહ્યું હોવાથી આગામી સમયમાં ગરમીથી મોટી રાહત મળશે. જો કે, હાલ પવનની દિશા અને ભેજના કારણે વાતાવરણમાં ભારે ઉકળાટ અનુભવાઈ રહ્યો છે. સૌરાષ્ટ્રના ભાવનગરમાં પારો ૪૧.૯ ડિગ્રી પર પહોંચી જતાં લોકો તોબા પોકારી ઉઠ્યા હતા. આ દરમિયાન દક્ષિણ ગુજરાતના વલસાડ, નવસારી અને સુરત સહિતના જિલ્લાઓમાં આજે ગાજવીજ સાથે વરસાદી ઝાપટાં પડવાની શક્યતા છે, જેને પગલે ખેડૂતોમાં પણ આનંદની હેલી જોવા મળી રહી છે.

 એક તરફ પશ્ચિમ ભારતમાં ચોમાસાની આતુરતાપૂર્વક રાહ જોવાઈ રહી છે, ત્યારે બીજી તરફ ઉત્તર પ્રદેશમાં કુદરતે રૌદ્ર સ્વરૂપ ધારણ કર્યું છે. યુપીમાં અચાનક ત્રાટકેલા ભયાનક વાવાઝોડા અને વીજળી પડવાની અલગ-અલગ ઘટનાઓમાં ૫ લોકોએ પોતાના જીવ ગુમાવ્યા છે.

હવામાન નિષ્ણાતોના જણાવ્યા અનુસાર, નૈઋત્યનું ચોમાસું દેશના પૂર્વીય અને મધ્ય ભાગો તરફ ઝડપથી આગળ વધી રહ્યું છે અને હવે તે છત્તીસગઢની બોર્ડર સુધી પહોંચી ચૂક્યું છે. જો સાનુકૂળ સિસ્ટમ સક્રિય રહેશે તો આગામી થોડા જ દિવસોમાં ચોમાસું સત્તાવાર રીતે ગુજરાતમાં પણ દસ્તક દેશે. તંત્ર દ્વારા પણ પ્રી-મોન્સૂન કામગીરીને આખરી ઓપ આપી દેવામાં આવ્યો છે અને સંભવિત વરસાદને પગલે નીચાણવાળા વિસ્તારોને એલર્ટ રહેવા સૂચના આપવામાં આવી છે.