સુરતના નાસીરનગરમાં હાથ ધરવામાં આવેલા ડીમોલીશનની ઘટનાને આજે 16 દિવસ પૂર્ણ થયા છે, પરંતુ વિવાદ શાંત થવાનું નામ નથી લઈ રહ્યો. આ સમગ્ર મામલાની તપાસ માટે મનપા કમિશનર દ્વારા કમિટીની રચના કરવામાં આવી હોવા છતાં, ગ્રાઉન્ડ લેવલ પર કોઈ નક્કર કાર્યવાહી ન થતા અસરગ્રસ્તોમાં ભારે આક્રોશ જોવા મળી રહ્યો છે.

કોંગ્રેસના પૂર્વ કોર્પોરેટર અસ્લમ સાયકલવાલાએ સ્થિતિ અંગે ગંભીર ચિંતા વ્યક્ત કરતા જણાવ્યું હતું કે- ડીમોલીશનને 16 દિવસ વીતી ગયા છે, પરંતુ આ 84 પરિવારો માટે હવે ઉપર આભ અને નીચે ધરતી સિવાય કોઈ વિકલ્પ બચ્યો નથી. તેમણે વધુમાં આરોપ લગાવ્યો કે, મનપા અને પોલીસ તંત્ર દ્વારા અત્યાચારનો ભોગ બનેલા આ પરિવારોને હવે અલગ-અલગ રીતે દબાવવાના પ્રયાસો થઈ રહ્યા છે.

અસ્લમ સાયકલવાલાએ આક્ષેપ કર્યો છે કે, વહીવટી તંત્ર અને વચેટિયાઓ દ્વારા અસરગ્રસ્તોને આર્થિક પ્રલોભનો આપીને કે ડરાવી-ધમકાવીને 'સ્વૈચ્છિક ડીમોલીશન' જેવું દર્શાવવાનો પ્રયાસ કરવામાં આવી રહ્યો છે. તેમણે સ્પષ્ટ કર્યું કે- અમારી સામે હજુ સુધી એવો એક પણ વ્યક્તિ નથી આવ્યો જેણે પોતાની મરજીથી આ કામ કર્યું હોય. તંત્ર અને દલાલો મારફતે લોકો પર દબાણ નાખવામાં આવી રહ્યું છે કે તેઓ ચૂપ થઈ જાય.

જોકે, પૂર્વ કોર્પોરેટરે વિશ્વાસ વ્યક્ત કર્યો છે કે, આ તમામ દબાણો છતાં 70 ટકાથી વધુ પરિવારો ન્યાય મેળવવા માટે અડીખમ ઉભા રહેશે. તેમણે કહ્યું કે- આ પરિવારો કોઈ પણ આર્થિક પ્રલોભનમાં આવવાના નથી. જે લોકોએ અત્યાચાર કર્યો છે તેમને સજા મળે અને અસરગ્રસ્તોને ન્યાય મળે ત્યાં સુધી આ લડાઈ ચાલુ રહેશે.

નાસીરનગર ડીમોલીશનના આખા કાંડમાં પ્રથમ દિવસથી જ એક મહત્વનો પ્રશ્ન અકબંધ છે, જે આજે 16મા દિવસે પણ ચર્ચાનો વિષય બન્યો છે. આટલા મોટાપાયે હાથ ધરવામાં આવેલી તોડફોડની કાર્યવાહી આખરે કયા સક્ષમ અધિકારીના આદેશથી કરવામાં આવી? સુરત મહાનગરપાલિકા પાસે આ કાર્યવાહી માટે કોઈ લેખિત મંજૂરી કે સત્તાવાર દસ્તાવેજ ઉપલબ્ધ છે ખરા?