જૂનાગઢ સહિત ગુજરાતના વિવિધ જિલ્લાઓમાં સક્રિય થયેલી ‘લૂંટેરી દુલ્હન’ અને લેભાગુ દલાલોની ટોળકીએ અનેક યુવાનોને લગ્નની જાળમાં ફસાવી 50,000 થી 1,50,000 રૂપિયા સુધીની રકમ પડાવી હોવાનું સામે આવ્યું છે. આ આંતરરાજ્ય ગેંગ મંદિર અથવા કોર્ટમાં કરાર આધારિત લગ્ન કર્યાના ગણતરીના દિવસોમાં જ પૂર્વ આયોજિત કાવતરા મુજબ કન્યાને ભગાડી જઈ છેતરપિંડી આચરે છે. સ્થાનિક પોલીસ દ્વારા એફઆઈઆર દાખલ ન કરાતા ભોગ બનેલા યુવાનોએ હવે રાજ્યના પોલીસ વડા અને મુખ્યમંત્રીને પત્ર લખી આ ટોળકી વિરુદ્ધ માનવ તસ્કરીની કલમો હેઠળ કડક કાર્યવાહી કરવા માંગ કરી છે.